په ورته وخت کې امریکايي چارواکیو «اېن بي سي» تلوېزیون ته ویلي چې د ولسمشر ډونالډ ټرمپ اداره غواړي له افغانستانه د ګڼ شمېر امریکايي ځواکونو بېرته ایستل وارزوي.
د د پنټګان د چارواکیو په وینا، لا هم کومه پرېکړه نهده شوې؛ خو اټکل کېږي چې دا پلان د نوي زېږدیز کال له پیلېدو لږ وروسته ولسمشر ته وسپاري.
په ورته وخت کې نیویارک ټایمز ورځپاڼه لیکي چې ولسمشر ټرمپ به راتلونکیو څوو میاشتو کې له افغانستانه ۷ زره عسکر وباسي.
د امریکا ځېنو چارواکیو دغه څرګندونې داسې وخت کې کړي چې ولسمشر ټرمپ یوه ورځ مخکې سوریې څخه د امریکایي عسکرو د بېرته را ایستلو اعلان هم وکړ.
له سوریې د امریکايي ځواکونو د اېستلو په هکله د ډونلډ ټرمپ پرېکړه په کور او بهر له نیوکو سره مخ شوېده.
لهدې پرېکړې یوه ورځ وروسته د امریکا دفاع وزیر جیمس متیس استعفا کړېده.
ښاغلی متیس افغانستان کې د امریکايي ځواکونو په ساتلو باوري و او دا ځواکونه یې سولې ته د رسېدلو لهپاره د ډيپلوماټیکو هڅو په پرمختګ کې مهم بلل.
په افغانستان کې د مېشتو امریکايي ځواکونو قوماندانۍ د امریکايي ځواکونو د خروج په اړه له تبصرې کولو ډده کړې ده.
امریکا دا مهال په افغانستان کې نږدې ۱۴ زره سرتېري لري. ولسمشر ډونلډ ټرمپ تر ولسمشر کېدو مخکې هم د افغانستان د جګړې مخالف و؛ خو د خپلو جنرالانو په هڅونه تېر ۲۰۱۷ز کال کې د د دې جګړې اوږدولو ته تیار شو.
دا راپورونه داسې مهال خپریږي چې د امریکا او طالبان استازي د جګړې د پای ته رسولو په موخه په مخامخ خبرو بوخت دي.
