قندوز شهری اوتکن 10 کون جریانیده نیچه مرته امنیتی کوچلر بیلن طالب جنگری‌لری اورته‌سیده قولمه قول بولدی؛ بیراق بو مرته مذکور ولایت پولیس قومندانی محمدقسیم جنگل‌باغ‌نینگ ایتیشیچه، طالب‌لر باشقه بو شهرگه قیتمه‌یدی. اونگه کوره، حاضر بغلان ولایتی «جرخشک» یولی آچیلگن و ینگی کوچلر قندوز شهریده جایلشگن.
قندوز پولیس قومندانی‌نینگ ایتیشیچه، قندوز شهریده‌گی مرکزی کسلخانه، خاکنی، کوتی گرد و چوک یولی‌دن بالاحصارگچه قورال‌لی طالب‌لردن تازه‌لنگن و تازه‌لش عملیات شهر ایچیده دوام ایتماقده.
باشقه تاماندن، قندوز ولایتی کینگشی باشلیغی محمدیوسف ایوبی‌نینگ ایتیشیچه، شهر بوزیلگن و کمیده 30 مینگ عایله قندوزدن بدرغه بولگن. اونینگ کوپه‌یتیریشیچه، بدرغه‌لر وضعیتی‌گه دقت قیلینمه‌گن صورتده، انسانی مصیبت یوزبیریشی ممکن.
بیراق، پارلمان نماینده‌سی حاجی صالح‌گه کوره، قندوز، محلی رسمی‌لر تامانیدن طالب‌لرگه تاپشیریلگن و بو شهر اولرنینگ باشقروی بیلن طالب‌لردن تازه‌لنمه‌یدی. اونینگ اورغولشچه قندوز محلی رسمی‌لری چیتلنتیریلیب و شهر مدیریتی باشقه کیشی‌لرگه تاپشیریلیشی لازم.
مملکت شمال شرقی‌ده‌گی ولایت‌لرده امنیتی وضعیت یمانلشگنی و دولت‌گه قرشی طالب جنگری‌لری‌نینگ هجومی کوپیگنی اوشبو ولایت‌لر خلقی اورته‌سیده خواطرلرگه باعث بولگن.
تخار ولایتی جهادی قومندانلردن بیرقطاری، شمال امنیتی توغری‌سیده مرکزی دولت‌نی دقت سیزلیک‌که عیب‌لب ایتیشیچه، جمهور رییس، خلق سوزی‌گه قولاق سالمه‌یدی. اولرنینگ آگاه‌لنتیریشیچه، وضعیت شونده‌ی بیرحالده دوام ایتکن صورتده، افغانستان کته بیر قیین‌چیلیک‌که روپه‌ره بوله‌دی.
باشقه تاماندن، مملکت تشقی ایشلر وزیری صلاح الدین ربانی، تخار ولایتی‌گه سفر قیلیب ایتیشیچه، بدخشان‌ده طالب‌لرگه قرشی کوره‌شیش خصوصیده خلق ارا بیر دفاعی کینگش ایجاد ایتیلگن و شونینگ‌دیک بیر کینگش یقین آره‌ده تخارده ایجاد ایتیلیشی ممکن. تشقی ایشلر وزیری‌نینگ ایتیشیچه، خلق کینگشی خودمختار یاشلرنی طالب جنگری‌لریگه قرشی کوره‌شیش اوچون امنیتی کوچلر بیلن بیرلشتیره‌دی.
عین حالده، تخار ولایتی کینگشی عضوی عصمت‌الله قربانی‌نینگ اورغولشیچه، قندوزده طالب جنگری‌لری‌نینگ جنایت‌لرینی یاشیرگن کیشی‌لر حکومت تامانیدن محکمه بولیشی لازم.
قندوز شهری طالبان نظارتی‌گه اوتکنی‌دن کیین، اوشبو گروه جنگری‌لری تخار و بدخشان تومن‌لریده هجوم‌لرینی شدت لنتیردی. اوشبو مسئله باعث، جهادی قومندانلر طالب‌لرگه قرشی کوره‌شیش خصوصیده، قیته‌دن قولیگه قورال آلگن.
