پروان ولایتی سیاهگرد تومنی گه تیگیشلی «جوی دختر بالا» قیشلاغیدهگی بیر مسجد یقیینلیگیده بیر هاوان اصابتی باعث 4 تینچاهالی هلاک بولدی کیم مذکور قیشلاق یشاوچیلریدن قطاری اوشبو هاوان آتیلیشی نی امنیتی کوچلرگه نسبت بیرگن.
اولرنینگ ایتیشلریچه، اوتگن کون (شنبه 10- جوزا) توشدن کیین مذکور قیشلاق یقیینلیگیده جایلشگن قرارگاه عسکرلری طالبلرنینگ نشان آلیش نیتیده بو قیشلاق اوستیگه هاوان آتیشگن، بیراق بو هاوان بیر مسجد یقیینلیگیده اصابت قیلگن.
جوی دختر بالا قیشلاغی یشاوچیلری سیفالدین و محمداشرف (مستعار آت) نینگ سلاموطندارگه ایتیشیچه، مذکور حادثه عاقبتیده 3 باله شامل 4 تینچاهالی هلاک و 2 باله شامل باشقه 4 کیشی تن جراحتی کوتارگن.
بیراق سیاهگرد تومن ولسوالی نورآقا سامی نینگ ایتیشیچه، بو هاوان طالبان گروهی آرقهلی آتیلگن.
اونگه کوره، اوشبو حادثهده 3 باله و بیر ایرکک شامل 4 کیشی هلاک و بیر باله و بیر ایرکک شامل باشقه ایکی کیشی یرهلنگن.
طالبان سوزلاوچیلریدن بیری ذبیحالله مجاهد بیر توییت آرقهلی، مذکور حادثهده طالبان جنگریلری نینگ قولی بارلیگی نی رد قیلیب ایتیشیچه، بو هاوان امنیتی کوچلر آرقهلی آتیلگن.
سیاهگرد محلی مسئوللری نینگ اورغولشیچه، طالبان اوزلری نی برائت بیریب حکومت و امنیتی کوچلرنینگ بدنام قیلیش نی ایستهیدی.
