قندوز شهری‌نینگ غربی‌ده‌گی پولیس اوچینچی حوزه یشاوچی‌لری، قوراللی اوغیریلیک کوپه‌یگنی‌دن خواطر بیلدیریب ایتیشیچه، سونگی کونلرده کیچه تاماندن قوراللی گروه‌لر، اویلرگه کیریب اهالی‌نینگ بار و یوغی‌نی اوزلری بیلن آلیب کیته‌دیلر.
محل یشاوچیسی نعیم‌نینگ سلام‌وطندارگه ایتیشیچه، کیچه تاماندن قوراللی اوغیریلیک کوپه‌یگنی باعث، اولر شخصی قوراللری بیلن اویلرینی قوریدیلر.
قندوز شهری پخته میدان یشاوچیسی جاویدنینگ ایتیشیچه، کیچه اویقولری یوق و تانگ آتگینچه تام اوستیده قوروقچیلیک قیله‌دیلر.
شونینگ‌دیک، قندوز پولیس قومندانلیگی، مذکور منطقه‌ده قوراللی اوغیریلیک کوپه‌یگنینی تَن آلیب ایتیشیچه، امنیت یخشی‌لنیشی و کیچه تاماندن بولگن قوراللی اوغیرلاوچی‌لرنینگ آلدی آلینیشی خصوصیده، اولر بو منطقه‌ده سیار گروه ایجاد ایتگن.
قندوز پولیس قومندانی محمدقسیم جنگل‌باغ، اوغیریلیک رقمی توغری‌سیده معلومات بیرمه‌یدی، بیراق ایتیشیچه، اهالی تینچلیگی‌نی قیتریش اوچون سعی و حرکت قیله‌دیلر.
شونده‌ی بیرحالده، نیچه هفته آلدین، قوراللی اوغیرلاوچی‌لر، کوندوز کون شهرگه کیریب نیچه داروخانه و دوکان‌نی تالان قیلیب عادی اهالی‌نینگ بار و یوغی‌نی آلیب کیتگن ایدی.
