کتاب ـ انسان نینگ اېنگ یقین دوستی، آدم او بیلن صحبتلشیشدن هیچ قچان زېریکمه یدی. بو کبی دوست بیلن صحبت قوریب تورگن انسان اۉز وقتینی قندهی اۉتگنینی سېزمَی قالهدی. کتاب بیلن صحبتده اۉتگن وقت البته که بیکارگه کېتمهیدی.
انسان اونینگ هر بیر لحظه و دقیقه سیدن اۉنیملی فایدهلنیب، اۉز معلومات و بیلیمینی آشیرهدی. کتاب اۉقیش انسان بیلیمینی آشیریب، اونینگ شخصیتینی یوکسلتیریش و رواجلنتیریشده قیاس سیز رول اۉینهیدی. کتاب دنیاسی بیلن تنیشیش انسان معنوي دنیاسینی کېنگییشیگه سبب بۉلهدی. شونینگ اوچون برچه سوادلی کیشیلر، اَینیقسه اۉقووچی و محصّللر کتاب اۉقیش و کتابلردن اۉنیملی فایده لنیشگه اۉزلرینی اۉرگتیشلری کېرهک.
کتاب اۉقیش مدنیتی رواجلنمهگن جمعیت، اۉز مادي و معنوي حیاتیده ترقیاتگه اېریشهآلمهیدی. کتاب اۉقیش و اوندن امکانگه قدر کۉپراق و اۉنیملی راق فایدهلنیش اوچون، اۉقیش و مطالعه قیلیش نینگ بیر قطار اصول و قاعده لرینی یخشی بیلیب، اولرنی تۉغری قۉللش کېرهک بۉلهدی.
انهشوندهیگینه، کتابخوان اۉقیگن نرسه لرینی اۉرگنیب اۉزلشتیرهآلهدی. چونکه اۉقیش بیلن اۉرگنیش بیر- بیریگه چمبرچسپ باغلیق. اۉرگنیش و اۉرگنیلگن موضوعلرنی اۉزلشتیریش فعّال اۉقیش و مطالعه قیلیش نتیجه سیده میسَّر بۉلهدی.
کتاب اۉقیش و مطالعه جریانیده قَیسی اصولدن فایدهلنیش کېرهک؟
اۉقووچی و محصّللر اوچون کتاب اۉقیش نینگ یخشی و تأثیرلی اصولینی تنلش اولرنینگ قطار قیینچیلیکلرینی برطرف قیلهآلهدی. اۉقیش و مطالعهده تۉغری اصول- قاعدهلرنی تنلهگن کیشیلرگینه تحصیل آلیش و علم اۉرگنیشده موفقیتگه اېریشهدیلر.
عالملرنینگ اَیتیشلریچه، یخشی کتاب اۉقی آلیش انسانگه توغمه خصلت و مهارت اېمس، اونینگ اوچون شبهه سیز مخصوص تربیه لنیشگه احتیاج سېزیلهدی. اۉرگنیش انسان بوتون حیاتی، اینیقسه اونینگ تحصیل آلیش دوریده کتّه اهمیتگه اېگه. چونکه اۉقووچی و محصّللر بیلیم اۉرگنیش و تحصیل آلیش جریانیده دایم امتحان بېریش و سیناودن اۉتیشگه مجبورلر. اولر اوشبو سیناولرده هر دایم موفقیت قازانیش آرزوسیده بۉله دیلر.
بیر قطار اۉقووچی یا محصّللر موضوعلرنی یادلش و حافظه گه تاپشیریش بیلن کفایهلنهدیلر. امّا اولرنینگ توشونچه و معناسینی اۉرگنیشگه لازم اعتبار قرهتمه یدیلر. بو اېسه موضوع نینگ بیر آز مُدّتدن سۉنگ اونوتیلیشیگه سبب بۉلهدی. اصلیده اۉقیش و مطالعه دن مقصد ـ اۉقیلگن مطلب نینگ معنا و توشونچه سینی اۉرگنیشدن عبارت.
اۉقیلگن مطلب بوتونلهی اۉرگنیلیب، آلدینگی معلوماتیمیز بیلن باغلنیشی اوچون، او معناگه اېگه بۉلیشی کېرهک. شونده گینه اونی اۉرگنیش احتمالی کۉپراق و اونوتیش احتمالی آزراق بۉلهدی. شونینگ اوچون، بو کبی معمالرگه دوچ کېلگن کیشیلر، اۉزلریگه عادت بۉلیب قالگن اۉقیش و مطالعه اصولیدهگی کمچیلیکلرنی انیقلب اولرنی توزهتیش و ینگی تأثیرچن اصول- قاعده لرنی قۉللش بیلن درس اۉقیش و مطالعه قیلیشدن لذّتلنهآلهدیلر.
کتاب اۉقیشده عادت بۉلگن اصوللرنی اۉزگرتیریب ینگی تأثیرچن اصول- قاعده لرنی قۉللش اوچون، قوییدهگی باسقیچلردن اۉتیش کېرهک:
1- موضوعدن آگاه بولیش؛
2- مطالعه قیلیش اوچون تنلنگن موضوعگه قیزیقیش؛
3- موجود حالتلرنی نظرده توتیب قۉلگه کیریتیلگن معلوماتنی بهالش؛
4- سیناو (فکرنی ایشگه سالیش)؛
5- ینگی فکر بیلن اۉزنی ماسلشتیریش و اونی قبول قیلیش.
حاضرگی زمان تعلیم و تربیه ساحه سی بۉییچه متخصص عالملر تامانیدن کتاب اۉقیش نینگ بیرقطار اصول- قاعده لری بېلگیلنگن. اولردن ایریملری بیلن تنیشیش، مطالعه جریانیده اولرنی قۉللش، کتاب اۉقیشده قطار قیینچیلیکلرنی برطرف قیلیش اوچون بیزگه یاردم بیرهآلهدی. اۉقیش و مطالعه اوچون تۉغری و اۉنیملی اصول تنلش، قوییدهگی نتیجهلرگه آلیب کېلهدی:
1- اۉقیش وقتینی قیسقرتیرهدی؛
2- یادلش و خاطرهگه تاپشیریش میزانینی آشیرهدی؛
3- مطلب- موضوعلرنینگ خاطره ده سقلنیش مدّتینی اوزهیتیرهدی؛
4- اخبار و معلوماتلرنی حافظه گه تاپشیریشنی آسانلشتیرهدی.
فعال اۉقیش و مطالعهده ایریم مسألهلرنی کۉزده توتیش ضرور حسابلنهدی. اولردن بیری ـ کتاب اۉقیش جریانیده مهم مطلبلرنی دفترگه کۉچیریب آلیش دیر. چونکه ضرور بۉلگن پَیتیده، قیتهدن کتابگه مراجعت قیلمسدن فقط اۉشه کۉچیرگن یادداشتلرینگیزنی کۉریب اۉتیشینگیز نی اۉزی کفایه قیلهدی. یازمسدن و یادداشت کۉچیرمسدن اۉقیش، مطلبلرنی اونوتیلیش سببلریدن بیری دیر. کتاب اۉقیشده قۉللنهدېگن بېش اصول: یازمسدن اۉقیش، مهم مطلبلر آستیگه خط چیزیش، صفحه چېکّه سیگه یازیش، کلید سۉزلرنی یازیب آلیش، اۉقیب اۉتیلگن موضوعنی خاطرهدن بیان قیلیش یا که یاد دن اَیتیش دن عبارت.
یازمسدن اۉقیش، ناتۉغری اصول حسابلنهدی. چونکه اۉقیش بیر فعّال جریان بۉلیب، اونده مطلبلرنی یخشی اۉرگنیش اوچون برچه حِسلرنی ایشگه سالیش کېرهک: کۉز بیلن خطدهگی موضوعلرنی کۉریب، ضرور پَیتیده اولرنی بلند آواز بیلن اۉقیش و قۉل بیلن مهم جایلرینی یازیش کېرهک.
خط چیزیش اصولی آلدینگیدن کۉره تأثیرلی راق حسابلنهدی. بیراق، بونده کتاب اۉقووچی آلدین مطلبلرنی اۉقیب اۉرگنیب، سۉنگره آستیگه خط چیزیشی کېرهک. بیراق، او بوتون فکرینی فقط گینه خط چیزیش بیلن بند قیلسه، بو اصولدن کۉزده توتیلگن مقصد قۉلگه کېلمهیدی، البته. بعض بیر نرسهلرنی کتاب چېکّهسیگه یازیش اصولی هم آلدینگی ایکّی اصولدن کۉره یخشیراق سَنَلهدی. امامطلبلرنی چوقور اۉرگنیش، خصوصاً درسلیکلرنی اۉقیش اوچون مکمّل اصول اېمس.
کلید سۉزلرنی یازیب آلیش یا که قیسقرتمه یازیش ـ بو اۉرگنیلگن مطلبلرنی قیسقه گینه دفترگه یازیب آلیشدن عبارت. اوشبو قاعده آلدینگی اَیتیب اۉتیلگن اصوللردن یخشیراق حسابلنهدی، چونکه کتابخوان او آرقهلی آلدین مطلبلرنی اۉرگنیب، سۉنگره یازهدی.
خاطره دن بیان قیلیش اصولیده، اۉقیب اۉرگنیلگن مطلبلر، اېندی کتابگه مراجعت قیلمهی توریب کتابخوان نینگ اۉز سۉزلری و عباره لری بیلن یاد دن اَیتیلیشی، اۉزی تمانیدن بېریلگن سۉراقلریگه اۉزی حافظه سیگه تیهنگن حالده جواب بېریشی کېرهک. کتابنینگ هر بیر فصلینی اۉقیب اۉتگندن سۉنگ اوشبو اصول تکرارلنیشی ضرور. چونکه بو اصول اۉقیش و مطالعه نتیجهسینی کۉریش اوچون سیناودن عبارت دېسه هم بۉلهدی. کتاب اۉقیش و مطالعه قیلیش نینگ باشقه هم کۉپلب اصوللری موجود، بیراق شو اَیتیلگنلرنی قۉللش بیلن باشقه اصول- قاعدهلرنی اۉرگنیشگه هم اېریشیلهدی.
