قندهار ولایتیدن امنیتی بیر منبع نینگ ایتیشیچه، اوتگن کیچه طالبان گروهی مذکور ولایت نینگ ژری تومنیده پولیس پوسته‌لریدن بیری گه هجوم قیلیب و امنیتی کوچلر بیلن آتیشگن.
اوشبو امنیتی منبع آتی فاش ایتیلیشی‌نی ایستمه‌ی سلام‌وطندارگه ایتیشیچه، بو هجوم ده ملی پولیس عسکرلردن 7 ته‌سی هلاک ایتیلگن و باشقه 5 ته‌سی یره‌لنگن.
منبع گه کوره، آتیشمه یاردمچی کوچلر محل گه ییتیشگنیدن سونگ، بوگون «پنجشنبه، 29- جوزا» ایرته‌لب ساعت 3 اطرافیده یکونلنگن.
بیراق، قندهار پولیس قومندانلیگی سوزلاوچیسی جمال‌ناصر بارکزی، اوشبو خبرنی تصدیقلب ایتیشیچه، طالبان نینگ هجومی ده یالغیز بیر پولیس جان بیرگن و باشقه بیر پولیس یره‌لنگن.
اونینگ کوپه‌یتیریشیچه، بو هجوم ده طالبان نینگ جنگریلریدن هم 8 ته‌سی هلاک و باشقه 3 ته‌سی یره‌لنگن.
طالبان گروهی حاضرگه‌قدر بو توغریده هیچ نرسه دیمه‌گن.
ایتیش کیره‌ک کیم، اوتگن کون هم طالبان گروهی تامانیدن قندهار ولایتی نینگ شورابک تومنی «سارکوی» منطقه‌سی و تخته‌پل تومنی «ملید» منطقه‌سیده جایلشگن ملی پولیس عسکرلرنینگ پوسته‌لری اوستیگه اویوشتیریلگن هجوملرده ملی پولیس عسکرلریدن 10 ته‌سی هلاک ایتیلگن ایدی.
