تخار ولایتی نینگ اشکمش تومنی یشاوچیلریدن بیرقطاری، اوروش دن بدرغه بولیب تخار مرکزی تالقان شهری گه کیلیشگن و اولر مذکور تومنده حربی عملیات باشلنمهگنیدن شکایت قیلگنلر.
اولر اشکمش شهری اطرافیده طالبان کینگ شکلده حضور تاپگنینی بیلدیریب و بو تومن طالبان گروهی نینگ قولی گه سقوط قیلیشی توغریسیده آگاهلنتیرگن.
خوفسیزلیک قوشمه کوچلری کمیده ایکی هفته دن بویان اشکمش تومنی نینگ مرکزیده جایلشگن، بیراق حاضرگهقدر بو تومنده طالبان گروهی نینگ قتهغن قیلیش اوچون حربی عملیات باشلمهگن.
تخار ولایت کینگشی اعضاسی عصمت قربانی نینگ ایتیشیچه، اشکمش تومنی مرکزیده طالبان گروهی نینگ حضوری یامان نتیجه بیریشی ممکن. اونگه کوره، طالبان گروهی بو تومنده مستحکم مواضع ایجاد قیلگن.
اشکمش تومنیدن آتی سِر قالیشی نی ایستمهگن ایشانچلی بیر منبع هم مذکور تومن طالبان گروهی نینگ قولی گه سقوط قیلیشی توغریسیده آگاهلنتیرگن.
اوشبو منبع نینگ سلاموطندارگه ایتیشیچه، طالبان جنگریلری اشکمش مرکزی اوستیگه هجوم قیلیش اوچون تیارگرلیک آلماقده.
مذکور منبع گه کوره، حربی تشکیلاتی نینگ خاص کوچلری اشکمش تومنیده کینگ شکلده جایلشگن، بیراق طالبان گه قرشی اوروشمهیدی.
بیراق، تخار حاکمی سوزلاوچیسی جواد هجری نینگ ایتیشیچه، قربان هییت بیرهمی اوچون اشکمش ده حربی عملیات یولگه قوییلیشی توختهتیلگن و بو عملیات باشقه نیچه کونگچه باشلنهدی.
جناب هجری، اشکمش تومنی نینگ مرکزیده جدی تهدید بارلیگینی تَن آلهدی، بیراق ایتیشیچه، مذکور تومنده کوپلب حربی کوچلری جایلشتیریلگن.
تخار خوفسیزلیک منبعلریگه کوره، طالبان گروهی اشکمش تومنی نینگ مرکزی گه هجوم قیلیش اوچون بغلان و قندوز ولایتلریدن یاردمچی کوچ چقیرگن و مذکور گروه نینگ بلند مرتبهلی رسمیلریدن بیرقطاری، جملهدن تخار ولایتی اوچون طالبان تامانیدن ناملنگن والی هم اشکمش تومنیده جایلشگن و امنیتی کوچلرنینگ برابریده طالبان نینگ اوروشی نی مدیریت قیلهدی.
طالبان گروهی 15 کون آلدین، اشکمش تومنی نینگ ایسکی شهرینی نظارت گه آلگن و بو گروه نینگ جنگریلری حاکمیتلری جریانیده تومن مرکزی اطرافیده اسلامی امارت گه عاید قاعدهلرنی تطبیق قیلگنلر.
اشکمش تومنی اهالیسی دن بیرقطاری نینگ ایتیشیچه، طالبان تلویزیون کوریش، عیاللر اوچون عقللی تلیفونلردن فایدهلنیش و عیاللر بازارگه باریشلرینی منع اعلان قیلگن.
اولرگه کوره، طالبان جنگریلری بو تومنده تلویزیون آنتنلرینی هم اوققه توتگن.
طالبان گروهی شونچه مدتده اشکمش ولسواللیگی و خوفسیزلیک قومندانلیگی بنالرینی نظارت گه آلیش اوچون اوچ مرته هجوم قیلگن، بیراق مؤفق بولیشمهگن.
شو توغریده…
طالبان گروهی تخار ولایتی نینگ اشکمش تومنی اوستیگه هجوم قیلگن
