له شاوخوا یوې لسیزه راهیسې عامې روغتیا او پوهنې وزارتونه ښوونځیو کې د نجونو زدهکوونکیو لهپاره د فولیکاسید ټابلېټ وېشلو پروګرام پلي کوي.
دغه فولیکاسید ټابلېټ هغو نجونو زدهکوونکیو ته ورکول کېږي چې عمرونه یې له ۱۰ کلونو تر ۱۹ کلونو پورې وي.
د عامې روغتیا وزیر فیروز الدین فیروز نن کابل کې یوې غونډې ته وویل، نجونو زدهکوونکیو ته د فولیکاسید ټابلېټ وېشل هېڅ ډول جانبي عوارض نهلري او د هغوی د ذکاوت او هوش لوړلو کې مهم رول لري.
د ښاغلي فیروز په وینا، یو شمېر کسان هڅه کوي چې د عامه ذهنیت په مغشوشولو سره نجونې زدهکوونکې د فولیکاسید ټابلېټ له کارولو را وګرځوي او داسې ګنګوسې یې خپرې کړي چې دغه ټابلېټ نجونو کې د اومیندوارۍ امکان کموي.
د عامې روغتیا وزیر زیاتوي، د دغه ټابلېټ مصرف لامل کېږي چې نجونې راتلونکې کې په ځانګړې توګه د اومیندوارۍ پرمهال د وینې کمېدو له ګواښه خوندي شي.
د پوهنې وزارت سرپرست میرویس بلخي نجونو زدهکوونکیو ته د فولیکاسید ټابلېټ وېشلو پروګرام څخه هرکلی کوي او وايي، تر هغه پورې چې زدهکوونکي له روغتیايي اړخه پرمختګ ونهکړي، د زدهکوونکیو وضعیت ښه کولو لهپاره د پوهنې وزارت هڅې پایله نهورکوي.
د هغه په وینا، ځېنې زدهکوونکي د متعددو ناروغیو په دلیل نهشي کولی، ښوونځي ته حاضر شي چې دغه موضوع د پوهنې وزارت او د زدهکوونکیو د کورنیو غړیو لهپاره ننګونې ده.
د ولایتونو د پوهنې یو شمېر رییسان ښوونځیو کې په بریالیتوب سره نجونو زدهکوونکیو ته د فولیکاسید ټابلېټ وېشلو پروګرامه خبر ورکوي او وايي، دغه پروګرام یوازې ناامنه ولسوالیو کې نه پلي کېږي.
د دایکنډي پوهنې رییس رحمتالله سیرت وايي، تېر کال پهدې ولایت کې د فولیکاسید ټابلېټ وېشلو پروګرام لهپاره ۱۹۰۰ ښوونکیو ته روزنه ورکړل شوېوه او وېشلو کې یې هېڅ ډول ستونزه نه وه.
خو د خوست د پوهنې رییس نصیراحمد روښان وايي، ځېنو ناامنو ولسوالیو کې د دې پروګرام پلي کولو کې ستونزه لري؛ خو ډېره جدي نهده.
د پوهنې وزارت د ۲۰۱۳ کال څېړنه ښيي چې هېواد کې له هرو ۳ ماشومانو، یو هغه د وینې د کمښت ناروغي لري.
همدارنګه ۴۰ سلنه ماشوملرونکې مېرمنې او ۳۰ سلنه هغه نجونې ـ چې عمرونه یې له ۱۰ کلونو څخه تر ۱۹ کلونو پورې دي ـ دغې ناورغۍ سره مخ دي.
د پوهنې وزارت مسوولان وايي، دغه وزارت ۲۰۱۶ او ۲۰۱۷ کلونو کې د فولیکاسید ټابلېټ وېشلو برخه کې څه باندې ۱۲ زره ښوونکیو، د ښوونځیو شورا غړیو، د ښوونځيو مدیرانو او د ولایتونو روغتیايي مدیرانو ته روزنه ورکړېده.
