فراه سیاسی فعاللریدن بیری بلقیس روشننینگ سلاموطندارگه ایتیشیچه، اوتگن کون کیچ قورون فراه ولایتینینگ جوین تومنی «تخت تیوسک» منطقهسیده امنیتی کوچلرنینگ کاروانی طالبلرنینگ پیستیرمهسیگه دوچ کیلگن.
اونینگ ایتیشیچه، اوشبو واقعهده جوین تومنینینگ ینگی امنیه قومندانی شامل امنیتی کوچلردن 22 تهسی هلاک ایتیلگن.
خانم روشن گه کوره، آتیشمه نتیجهسیده فراه پولیس قومندانلیگی خوفسیزلیک آمریتینینگ اورین باسری باشقه 4 عسکر بیلن یرهلنگن.
خانم روشن، امنیتی کوچلرنینگ یوقاری حربی تجهیزاتلر بیلن تجهیزلنمهگنینی، اوشبو کوچلرنینگ تلفاتی کوپهیشیگه دلیل قیلهدی.
فراه ولایتی کینگش اورین باسری شاهمحمود نعیمی اوشبو خبرنی تصدیق لهیدی.
اونینگ ایتیشیچه، مذکور واقعهگه فراه امنیه قومندانلیگینینگ اپراسیون آمری، جوین تومنینینگ ینگی امنیه قومندانی، فراه 5- امنیتی حوزه آمری و گلستان تولینینگ قومندانی هلاک ایتیلگن.
گزارشلرگه کوره، امنیتی کوچلر جوین تومنینینگ ینگی امنیه قومندانینی تانیتیش اوچون بارهدیگن بیر چاغده اوشبو واقعه یوز بیرگن.
