فراه ولایتیده امنیتی کوچلر و طالبلر آرهسیده یوز بیرگن آغیر آتیشمهدن بیر کون اوتگنیدن سونگ، مذکور ولایت محلی رسمیلرینینگ ایتیشیچه، باشقه ولایتلردن ایکی مینگدن آرتیق طالب فراه شهریگه کیلیب و بو شهرنی سقوط بیریش اوچون قصد قیلگن ایکنلر.
فراه حاکمی عبدالبصیر سالنگینینگ ایتیشیچه، اوشبو آتیشمهده قوراللی طالبلر آغیر زیان کورگن و حاضر امنیتی کوچلر فراه شهرینینگ اطرافیده اویمهاوی تازهلش عملیات باشلهگن و شونینگدیک، فراهنینگ اوزاق منطقهلری قوراللی طالبلردن تازهلنهدی.
جناب سالنگینینگ ایتیشیچه، بو آتیشمهده امنیتی کوچلردن 25 تهسی هلاک و 10 تهسی یرهلنگن؛ 3-4 کیشی تینچ اهالی هم هلاک بولگن و قوراللی طالبلردن 300 جنگری هلاک ایتیلگن. اونینگ ایتیشیچه، بو آتیشمهده قوشنی مملکتلرنینگ قولی بولگن و بو مملکتلر منفعتلرینی فراهنینگ ناتینچلیگیده ایزلهیدی.
عین حالده، فراه خوفسیزلیک قومندانی جنرال فضلاحمد شیرزادنینگ ایتیشیچه، ایران مملکتی قوراللی طالبلردن حمایت قیلیب و جهازلب فراه شهرینی نظارت گه آلیب و محبوسلرنی قوییب یوباریش اوچون سعی و حرکت قیلگن.
فراه ولایتینینگ ساغلیقنی سقلش ریاستی باشلیغی عبدالجبار شایقنینگ سلاموطندارگه ایتیشیچه، اوتگن کون فراه شهریده یوز بیرگن آتیشمهده امنیتی کوچلردن 25 جسد، تینچ اهالیدن 4 جسد و 74 یرهدار اوشبو ولایتنینگ ولایتی کسلخانهسیده رویخطگه آلینگن.
جناب شایق گه کوره، اوتگن کون یرهلنگنلردن 2 تهسی تینچ اهالی و باشقهسی امنیتی کوچلر بولگن.
عین حالده، فراه ولایتی یشاوچیلریدن بیرقطارینینگ ایتیشیچه، اوشبو آتیشمه و بوندن آلدین یوز بیرگن هجوملرده قطار اولتیریش اویلر بوزیلگن و حکومت زیان کورگنلرگه یاردم بیریشی کیرهک.
