بوگون «چهارشنبه» فراه یشاوچیلریدن اونلرچهسی، اوشبو ولایتنینگ پولیس قومندانلیگی و ولایت حاکمینینگ دفترینی اونگیده توپلهنیب ولایت حاکمی و پولیس قومندانی گه قرشی شعار بیرگنلر.
بیراق، یانغیننی اوچیرووچی پولیس کوچلری، اعتراضچیلرنینگ ترقاقلشتیریش اوچون اوستلریگه سوو سیپگن بیرچاغده، اعتراضچیلردن بیرقطاری، سوو سیپووچی موتر اوستیگه هجوم قیلیب و اونی بوزیب تشلهگنلر.
اوشبو واقعهدن سونگ، پولیس اعتراضچیلرگه قرشی اوق آتیشگن و نتیجهده، ایکی کیشی یرهلنگن.
اعتراضچیلرنینگ ادعا قیلیشیچه، فراه محلی حکومتی اوشبو ولایتده یوز بیرگن سونگی آتیشمهلرده قربانلیک بیرگن عایله اعضالری و محل قوم بویوکلریگه محلی اداره رسمیلری و مرکزی حکومت هیأتینینگ ییغینیده اشتراک قیلیشگه رخصت بیرمهگن.
اعتراضچیلردن بیری قدرتالله فاروقینینگ ایتیشیچه، اهالی سیقیلیب و باشقه عزیزلرینی قولدن بیریشگه چیده آلمهیدی.
اعتراضچیلردن باشقه بیری جواد تابشنینگ ایتیشیچه، اولر فراه ولایتیده ناتینچلیک میزانی آشگنی باعث، ناراضیلیک نمایش یولگه قویگنلر، بیراق اهالی ولایت مقامی و پولیس قومندانلیگی برابریده توپلنگندن سونگ، پولیس هوا گه اوق آتگن و نتیجهده اعتراضچیلردن 3 تهسی یرهلنگن.
شونینگدیک، فراه ولایت کینگشی اعضاسی جمیله امینینینگ ایتیشیچه، طالبلر فراه شهرینینگ دروازهلریگه ییتیشگن، ایریم رسمیلر مرکزی حکومت هیأتی بیلن اوتکزگن ییغینده شهر امنیتینی یخشی دیگنلر.
بیراق، خانم امینینینگ ادعالرینی رد قیلگن فراه حاکمی سوزلاوچیسی ناصر مهرینینگ ایتیشیچه، کابل کیلگن هیأت مدنی فعاللر، قوم بویوکلری و امنیتی رسمیلر بیلن ایری ییغینلر اوتکزگنلر.
جناب مهری گه کوره، فراه یشاوچیلری پولیسگه خبر بیرمهی ناراضیلیککه قول اورگنلر.
