د فاریاب امنیتي چارواکي وايي، ټاکل شوې افغان ځواکونو ته پهدې ولایت کې د مشورې ورکولو، همغږۍ او هوايي ملاتړ په موخه د ناټو ځواکونو یو شمېر سرتېري ځای پرځای شي.
فاریاب کې د شاهین قولاردو لومړۍ لوا قوماندان جنرال جنتګل کړوخېل وايي، دغه ځواکونه چې شمېر یې ۶۰ ته رسېږي؛ روانه اوونۍ د دې ولایت په مرکز «میمنې» کې ځای پرځای کېږي.
ښاغلی کړوخېل له طالبانو غواړي چې پهدې ولایت کې له جګړې لاس واخلي او د سولې له پروسې سره یو ځای شي.
دغه امنیتي چارواکی زیاتوي، د غوڅملاتړ ځواکونه له ځانګړې قطعې او پوځي سرتېرو نه په ځکمنیو عملیاتو کې کار اخلي او پهخپله هوايي بریدونه کوي.
سره لهدې چې د فاریاب اوسېدونکي دې ولایت کې د ناامنیو له زیاتوالي اندېښنه څرګندوي؛ خو فاریاب کې د ناټو ځواکونو ځای پرځایکېدو په اړه بېلابېل نظرونه لري.
د میمنې ښار اوسېدنکی صلاحالدین شکمن دی، وايي چې دولت او ناټو ځواکونه د طالبانو په ځپلو کې ریښتني نهدي؛ ګنې که صادقانه عمل وکړي؛ ټول طالبان په یوه شپه کې ختمولی شي.
له دې سره هممهاله سراجالله همدم فاریاب ولایت ته د ناټو ځواکونه له ورتګ سره خوشبیني ښيي او وايي چې د دوی له ورتګ سره به وضعیت ډېر ښه شي.
دا داسې مهال ده چې وړمه ورځ د فاریاب ولایتي شورا رییس سلاموطندار ته ویلي وو چې د طالبانو تر کنټرول لاندې سیمې پراخې شوي او د دې امکان شته چې دغه ولایت د طالبانو لاس ته ولوېږي.
