د فراه ولایتي شورا یوشمېر غړي وايي، طالبانو تېره شپه د دغه ولایت پر خاکسفېد او بالابلوک ولسوالیو بریدونه کړي دي. دوی په دې برخه کې حکومت په بېغورۍ تورنوي او وايي، د فراه پر سر یې معامله کړې ده.
د فراه ولایتي شورا مرستیال شاهمحمود نعیمي سلاموطندار ته وویل چې طالبانو د خاکسفېد ولسوالي پر خوست پوستې برید کړی چې له کبله یې شاوخوا ۴۵ سیمهییز پولیس وژل شوي دي.
د نعیمي په وینا، طالبانو د دغه ولایت پر یوشمېر نورو برخو هم بریدونه کړي چې له کبله یې د ۲ ملکیانو په ګډون ۵ امنیتي ځواکونه وژل شوي، ۴ ټپیان دي او ۹ سرتېري هم د هغوی لاس ته ورغلي دي. نوموړی زیاتوي، طالبانو د فراهښار د باغپل سیمې پر پوسته هم برید کړی چې ۲ ټانګونه او څو هټې یې سوځولې دي.
نعیمي په بالابلوک ولسوالي کې د ۲ پولیسو د وژل کېدو خبر هم ورکوي.
په همدې حال کې د فراه ولایتي شورا غړی ګلاحمد فقیري پر حکومت تور پورې کوي چې د فراه پرسر یې معامله کړې ده.
بلخوا د فراه امنیې قومندانۍ ویاند محبالله محب که څه هم پر دولتي پوستو د طالبانو بریدونه مني، خو وايي په یادو جګړو کې طالبانو ته هم مرګژوبله اووښتې ده.
د نوموړي په وینا، د خاکسفېد ولسوالي پر خوستې پوسې د طالبانو برید کې یې د ملا نوراغا په نوم مشهور قومندان یې له خپلو ۵ کسانو سره وژلی دی. محب زیاتوي، په یادو نښتو کې امنیتي ځواکونو ته هم مرګژوبله اووښتې، خو کره شمېره یې مالومه نهده.
خو د طالبانو ویاند قاري یوسف احمدي وايي، پر فراه ښار او خاکسفېد ولسوالي یې بریدونه کړي چې له کبله یې له ۴۰ ډېر امنیتي ځواکونه وژلي او نیولي دي.
