مملکت پولیس رنجر موتری ینه حادثه یره‌تدی. بوگون یک‌شنبه ایرتلب فاریاب پولیس موترلریدن بیری ایکی کیشی قوشیمچه بیر باله‌نی باسیب، واقعه ییریدن قاچیش نیت‌ده بولگن بیر چاغ‌ده باشقه بیر آلتمیش یاشیده بولگن کیشی تایرلر آستیگه آلگن.
فاریاب حادثه‌لر مدیریتی‌نینگ آمری جناب رمضان، واقعه میمنه مرکزی‌نینگ بیرینچی ناحیه‌سی «دمقول» منطقه‌سیده یوز بیرگن‌لیگنی ایتگن. جناب رمضانگه کوره، پولیس رنجر موترینی هیداووچی شخص امنیتی کوچلر آرقه‌لی قولگه آلینیب، بو حقده تیرگاوو باشلنگن.
باشقه تاماندن فاریاب شفاخانه تیزیاردم بولیمی‌نینگ کیچکی مسؤولی داکتر احسان‌الله اورته یاشلی بیر ایرکک‌نینگ جسدی ساغلیق‌نی سقلش اداره‌سیگه آلیب کیلینگن دیگن. شونینگ‌دیک او، یره‌لنگن قیرق یاشلی بیر خاتین، بیش یاشر بیر گودک و آلتمیش یاشلی بیر ایرکک شفاخانه‌گه کیلتیریلگن دیگن. ایتیلیشیچه، یره‌لنگن‌لرنینگ احوالی آغیر بولگن.
عینی گواه‌لردن بیری، تیز حرکت‌ده بولگن پولیس‌نینگ موتری دستلب بیر گودک، بیر خاتین و بیر ایرکک‌نی تیر آستیگه آلیب، حادثه ییریدن قاچیش‌گه قصد قیلگن بیر پیت‌ده ینه بیر کیکسه کیشی‌نی باسیب اوتگن‌لیگنی اظهار قیلگن.
عین حالده، میمنه شهری‌نینگ یشاووچی‌لری دولتی اینیقسه پولیس موترلری شهر ایچیده حددن تشقری تیز هیده‌لیشی باره‌سیده شکایت قیلیب، ولایت همده ترافیک اداره‌سی مسؤوللرینی بونده‌ی مساله‌لر اوچون بی فرق‌لیککه عیبله‌گنلر.
میمنه شهری‌نینگ یشاووچی‌لریدن احمدجاویدگه کوره، کونده پولیس‌نینگ اونلب موتری رسمی ماموریتی بولمسدن هم شهردن حددن تشقری تیز سرعت‌ده اوتیب قیته‌دی. ایریم حاللرده شهر ایچیده تیزرانلیک قیله‌دیلر. احمدجاویدگه کوره، پولیس نینگ کوپچیلیک هیداووچی‌لری شراب، چرس و مخدر ماده‌لرنی استعمال قیلگندن سونگ کوپراق بونده‌ی حادثه‌لر صادر قیلیشگه حرکت قیله‌دیلر.
بو قبیل حادثه‌لر مملکت ایریم شهرلریده یوز بیریب توره‌دی. اما رسمی‌لر بونده‌ی حادثه‌لر دوسیه‌سی جدی تیکشیریلیشی اوچون دییرلی اعتبار قرتمه‌گن‌لیگی تیلگه آلینه‌دی. بونده‌ی حادثه‌لر شهر و قیشلاق‌لرده کم یوز بیریشی اوچون دستلب دولت موترلرینی هیدیدگن شخص‌لر ترافیک قانونلرنی اورگه‌نیب چیقیش‌لری مقصدگه موافق ایکن‌لیگی هر دایم اظهار قیلینه‌دی.
