فاریاب ولایتی المار تومنیده ایرلشگن مردمی کوچلر قیشلاقلرنی اوروشمسدن طالبلرگه تاپشیریب اوزلری آرقه گه چیکلنگن.
فاریاب ولایتی قرایی قیشلاقی نینگ استراتیژیک منقطه سیدهگی مردمی کوچلر قومندانی خیرالله قرایینینگ سلاموطندارگه ایتیشیچه، طالبلر تصرفیگه اوتگن منطقه المار تومنینی قیصار، پشتونکوت، کوهستان، گرزیوان تومنلری و بادغیس و سرپل ولایتلری بیلن باغلهیدیگن منطقه بولیب، بو گون ایرتهلب امنیتی کوچلر توجه سیزلیگی سبب طالبلر تصرفیگه اوتدی.
قرایینینگ معلوم قیلیشیچه، امنیتی کوچلرنینگ 8 رنجری و ایکی تانکی هم طالبلر قولیده قالگن.
بو مردمی کوچلر قومندانی، فاریاب محلی رسمیلری نینگ امنیت سقلنیب قالیشی اوچون یاردم ییتکزمه گنلیگی دلیل طالبلر بیلن باشقه اوروش قیلمسگه قرار قیلیب اوروشلرده اشتراک ایتمسلیگینی اورغولیدی.
بو قومندانگه کوره، اولرگه وقتیده اوروش جهازلری ییتکزیلگنده ایدی، آرقه گه چیکلنمسدیلر، اما محلی رسمیلر اوق و قورال ییتکزیشده جدی یاندشمه گن. او فاریاب پولیس باشلیغینینگ مذکور قیشلاقلر سقوط قیلیشیگه عیبلیدی و ایتیشیچه، محلی قومندانلرنی بیرکوزده کورمسلیگی سبب اورتهلریده ساووغلیک توشگن.
قرایی نینگ ایتیشیچه، طالبلرگه قرشی اوروشنی باشله گنیدن حاضرگه قدر عسکرلریدن 70 کیشی توپراغدن دفاع قیلیش اوچون هلاک بولگن و باشقه قولیده امکانات بولمسدن اوروشیب عسکرلرینی اولیمیگه سبب بولمیدی.
اما فاریاب پولیس قومندانی سیدآقا اندرابی اوزیگه کیلگن اتهاملرنی رد قیلهدی و ایتیشیچه، المار قیشلاقلری سقوطیده خیرالله قرایی نینگ قولی بولگن. اونگه کوره، بیر هفته آلدین مردمی کوچلر طالبلر قمراویده قالگن ایدی، اما اولر عملیات یولگه قویب طالبلرنی آرقه گه اورگن. شونینگدیک بولر محلنی ترک قیلیب مرکز کیلیشلری بیلن مردمی کوچلر قیشلاقلرنی طالبلرگه تاپشیرگن.
فاریاب پولیس باشلیغی نینگ معلوم قیلیشیچه، بو مردمی کوچلر باشلیغیگه خیالی عسکری بار ایدی و 40 عسکری بولمسدن 400 عسکر مصرفینی آلرکن. اونگه کوره، قرایی مساله نی مرکزی رسمیلر بیلن اورته گه قویمسدن محلنی قویباریب قاچگن.
اندرابی نینگ ایتیشیچه، مردمی کوچلر اورتهسیده فرق کیلتیریشمهگن.
المار تومنی اولسوالی محمدصالح صالح هم بو قیشلاقلر طالبلر تصرفیگه اوتگنلیگینی تأیید قیلهدی، اما بوبارهده بیرنرسه دیمیدی.
طالبلر تصرفیگه اوتگن قیشلاقلر قرایی منطقهسیده بولیب، المار تومنی نینگ ناتینچ منطقهلریدن سنلردی و بو منطقه طالبلر فعالیتیگه کوپلب شاهد ایدی. اوتگن ییل هم شو منطقه طالبلر قولیده سقو قیلیشی بیلن جمهورلیک سرایی بیرینچی اورین باسری جنرال عبدالرشید دوسم نینگ باریشی بیلن دولت تصرفیگه اوتگن ایدی.
