فاریاب امنیتی رسمیلرینینگ ایتیشیچه، مذکور ولایت‌نینگ پشتونکوت تومنی یشاوچیلریدن 25 کیشی‌نی قورال‌لی طالب‌لر حبس‌گه آلگن وباشقه تورت کیشی‌نی آتیب اولدیریلگن.
فاریاب امنیه قومندانلیگی سوزلاوچیسی عبدالکریم یورش‌نینگ سلام‌وطندارگه ایتیشیچه، قورال‌لی طالب‌لر قری و یاش باله‌لر شامل بولگن کیشی‌لرنی، خلق کوچلری بیلن توقنه‌شیش جریانیده، آوچ آلیش نیتی‌ده حبس‌گه آلگن. اونگه کوره، خلق کوچلری بیلن قورال‌لی طالب‌لرنینگ اورته‌سیده‌گی توقنه‌شوو شنبه کون باشلنگن و حاضرگچه دوام ایتماقده.
فاریاب امنیه قومندانلیگی سوزلاوچیسی، حبس‌گه آلینگن کیشی‌لرنی قوییب یوباریش اوچون، سعی و حرکت‌لر دوام ایته‌یاتگنی‌دن خبر بیره‌دی.
بیراق، فاریاب ولایتی کینگش مسؤول‌لری، هلاک بولگن‌لرنی 6 کیشی و حبس‌گه آلینگن‌لرنی 60 کیشی دییدی.
اوشبو کینگش باشلیغی محمدطاهر رحمانی‌نینگ سلام‌وطندارگه ایتیشیچه، فاریاب ولایتی‌نینگ پشتونکوت تومنی گلیم‌باف منطقه‌سیده امنیتی کوچلر تامانیدن قورال‌لی طالب‌لرنینگ ملاخنجر ناملی بیر قومندانی باشقه آلتی نفری بیلن اولدیرگنی‌دن کیین، مذکور گروه‌نینگ اعضالری، آوچ آلیش نیتی‌ده اوشبو منطقه یشاوچیلریدن باله‌لر شامل 60 کیشی‌نی حبس‌گه آلگن و باشقه ایکی عیال شامل 6 کیشی‌نی آتیب اولدیرگن‌لر.
اونگه کوره، یوزلرچه طالب ایریم منطقه‌لردن کیلیب گلیم‌باف منطقه‌سی اوستیگه هجوم اویوشتیرگن و اوچ کوندن بویان خلق کوچلری بیلن قورال‌لی طالب‌لرنینگ اورته‌سیده توقنه‌شوو دوام ایتماقده.
فاریاب ولایتی کینگش باشلیغی‌نینگ ایتیشیچه، پشتونکوت تومنی‌ده امنیتی وضعیت خواطرلی دیر، بیراق حکومت رسمی‌لری بو وضعیت‌گه نسبتن بی‌فرق یانده‌شه‌دی.
اونینگ آگاه‌لنتیریشیچه، حکومت خلق کوچلری‌گه یاردم بیرمه‌گن صورتده، اوشبو کوچلر کوپلب قربانلیک بیره‌دی و قورال‌لی طالب‌لر تینچ اهالینی اولدیره‌دی.
بیراق، فاریاب امنیتی رسمیلرینینگ ایتیشیچه، نیچه ساعت‌ده میمنه شهریدن یاردمچی کوچلر پشتونکوت تومنی‌نینگ گلیم‌باف منطقه‌سیگه ییتیشه‌دی.
طالب‌لر حاضرگچه تینچ اهالینی حبس‌گه آلگنی توغری‌سیده هیچ نرسه دیمه‌گن.
پشتونکوت فاریاب ولایتی‌نینگ تینچ‌سیز تومن‌لریدن بیری سنله‌دی و قورال‌لی طالب‌لر، او ییرده کوپلب نفوذ قیلگن.
