غور ولایتینینگ قطار سپورتچیلری گه کوره، اوشبو ولایتده سپورت میدان قوریلیشی خصوصیده، کوپلب پول بیریلگن، بیراق حاضرگچه بو ولایتده هیچ بیر میدان قوریلمهگن و اولر آچیق میدانده مشق قیلهدیلر.
اوشبو سپورتچیلرنینگ سلاموطندارگه ایتیشیچه، سپورت میدان قوریلیشی خصوصیده، اوشبو ولایتگه یاردم بیریلگن برچه پوللر، محل رسمیلری تامانیدن تالان قیلینگن.
ولایت سپورتچیلریدن بیری عبدالقیومنینگ ایتیشیچه، سپورت میدانی یوقلیگی باعث، سپورتچیلر ملی بیلشوولریگه اشتراک ایته آلمهگنلر.
سپورتچیلریدن باشقه بیری جان محمد، مسؤوللرنینگ دقت سیزلیگیدن شکایت قیلیب ایتیشیچه، بو ایش سبب، غور سپورتچیلری، باشقه ولایتلرنینگ سپورتچیلریگه قرهگنده کیین قالگن.
اولرنینگ ایتیشیچه، سونگی مرته کمیده ایکی مینگ کیشی سیغهدیگن سپورت میدان «جمنازیوم» قوریلیشی اوچون 12 لک دالر یاردم بیریلگن، بیراق بو پول هم تالان قیلینگن.
اوشبو ولایتده سپورت میدانلری یوقلیگینی تصدیقلگن غور ولایتینینگ سپورت بولیمی آمری محمد امیرنینگ ایتیشیچه، شو حاضر غور ولایتینینگ یالغیز بیر سپورت میدانی بار و بو میدان جاپان مملکتی تامانیدن دستلبکی شکلده قوریلگن، بیراق بو میدان ولایت سپورتچیلری اوچون ییترلی ایمس دیر.
شونینگدیک، غور حاکمینینگ سوزلاوچیسی عبدالحی خطیبی، اوشبو ولایتده سپورت میدانلری یوقلیگینی تصدیقلهیدی، بیراق سپورت میدان قوریلیشی اوچون بیریلگن پوللر تالان قیلینگنینی رد قیلهدی. اونینگ ایتیشیچه، محلی رسمیلر، هردایم اوشبو ولایت سپورتچیلری، شهرت قازانیشی اوچون سعی و حرکت قیلهدی.
غور سپورتچیلری، مملکت ملی المپیک کمیتهسینینگ دقت سیزلیگیدن خواطرلنیب ایتیشیچه، سپورتچیلر قوللریدهگی آز امکانیت بیلن ملی بیلشوولرده کوپینچه یوتوق قولگه کیریتگنلر.
