بوگون «دوشنبه، 5- جوزا» مملکت جمهور رئیسی محمداشرف غنی تامانیدن بولگن توییتده ایتیشیچه، آمریکا تشقی ایشلر وزیری مایک پمپئو بیر تلیفونی علاقه ده طالبان گروهی نینگ محبوس‌لریدن 2 مینگ ته‌سی قوییب یوباریلیشی توغریسیده افغانستان حکومتی نینگ ینگی قراریدن قدردانلیک بیلدیرگن.
جمهور رئیس غنی نینگ پمپئودن نقل قیلیب ایتیشیچه، آمریکا، افغانستانده اوزون مدتلی آتیش‌کیسین برقرار ایتیلیشی و ایرکین تینچلیک سوزلشوولری باشله‌نیشی‌نی ایسته‌یدی.
جناب غنی نینگ توییتی‌نی دوامیده کیلیشیچه، اوشبو تلیفونی علاقه مایک پمپئو تامانیدن او و ملی مصالحه عالی کینگشی باشلیغی عبدالله عبدالله بیلن بولگن.
شونینگدیک، بوندن آلدین آمریکا تشقی ایشلر وزیری، افغانستان دولتی و طالبان آره‌سیده اوچ کونلیک آتیش‌کیسین برقرار ایتیلگنینی خوش قرشی‌لگن ایدی. جمهورلیک ریاست سرایی، هییت کونلریده طالبان گروهی تامانیدن آتیش‌کیسین برقرار ایتیلیشی گه جواب مذکور گروه نینگ محبوس‌لریدن 2 مینگ ته‌سی قوییب یوباریلیشی‌نی باشله‌دی. طالبان گروهی افغانستان حکومتی نینگ بو قرارینی یخشی بیر آدیم دیگن.
قطرده طالبان گروهی نینگ سیاسی دفتری سوزلاوچیسی سهیل شاهین، اوتگن کون «یکشنبه، 4- جوزا» کیچ پیت قیلگن توییتده، طالبان و آمریکا آره‌سیده امضالنگن تینچلیک کیلیشوونامه اساسیده، ایکی تامان آره‌سیده ایشانچ قولگه کیریتیلیشی اوچون طالبان نینگ محبوس‌لریدن 5000 ته‌سی قوییب یوباریلیشی کیره‌ک دیگن.
شنبه کون، 3- جوزا، کیچ پیت طالبان گروهی اوچ کون هییت ده افغانستان حکومتی بیلن آتیش‌کیسین قیلیشی‌نی بیلدیردی. افغانستان حکومتی، طالبان گروهی تامانیدن آتیش‌کیسین اعلان قیلینیشی‌‌نی خوش قرشی‌لش گه علاوه، افغانستان دولتی هم آتیش‌کیسین قاعده‌سینی رعایت قیلیش گه اراده‌لی بولگنینی ایتدی.
