افغانستان حربی کوچلری جایلشگن ناتو گه اعضا همده ناتو گه اعضا بولمهگن دولتلر وکیللری جولاینینگ سکیزینچی و توقیزینچی کونلری پولند پایتختی وارسا شهریده توپلنه دیلر. اوشبو ییغینده افغانستان وضعیتی همده کیلهسی ییللر دوامیده ترورچیلیککه قرشی کورهشده افغانستاننی قندهی حمایت ایتیش مسالهسی محاکمه ایتیلهدی. مذکور ییغینده افغانستاننینگ بلند مرتبهلی رسمیلری جملهدن جمهور رییس محمد اشرف غنی، اجرائیه ادارهسی باشلیغی داکتر عبدالله عبدالله و مملکتنینگ امنیت سکتورلری باشلیغلری قتنشهدیلر.
رسمی کابلنی وارسا ییغینیده معین تکلیفلر بیلن اشتراک ایتیشی کوتیلهدی. افغانستاننینگ امنیت کینگشی مصلحتچیسی محمد حنیف اتمرگه کوره افغانستان هیئتی مذکور ییغینده کمیده آلتی ته تکلیف بیلن باره دی. 2020 – ییلگه قدر افغانستان امنیتی کوچلری اوچون هرییل بیش میلیارد دالر یاردم طرزیده توله نیلیشی، مملکت هوا کوچلرینی زمانوی حربی اوچاقلر و تخنیک امکانلر بیلن جهازلنتیریش، افغان کوچلرینی حربی تیارگرلیکدن اوتکزیش، و شونینگدیک مملکت قوراللی کوچلرینی زمانوی قورال – اسلحهلر بیلن تامینلش کبی موضوع لر وارسا ییغینیده آلغه سوریلهدیگن تکلیفلر جملهسیدن عبارت ایکنی ایتیلهدی. حنیف اتمر اوشبو تکلیفلر ناتو گه اعضا دولتلر تامانیدن قبول ایتیلیشیگه امیدوار. گرچند ناتو اینیقسه امریکا تامانی هلی گچه هم هر ییلی افغانستان حربی کوچلری اوچون بیر ییلده تخمیناً بیش میلیارد دالر تولب کیلماقدهلر.
ناتو همده افغانستانده کیسکین ماموریت جریانینی حمایت ایتووچی دولتلر طرفیدن ترورچیلیککه قرشی کابلنی اوزاق مدتگه قدر هر تامانلمه قوللب قوتلشی حیاتی اهمیتگه ایگه. وارسا ییغینی قرارلری هم کیلجکده افغانستانده ترورچیلیککه قرشی کورهش تقدیری اوچون مهم سنهلهدی. غرب دولتلری همده ترورچیلیککه قرشی کورهش مسالهسیده افغانستاننی حمایت ایتووچی دولتلر نینگ کوچلی ارادهسی ترور ترماغلرینی حمایت ایته دیگن ایریم تیورهک (حلقه) لر و بعضی بیر دولتلرنی مایوس ایتیشی ممکن. رسمی کابل وارسا ییغینی کبی مهم مجلسلردن جوده اوستهلیک و مهارت بیلن فایدهلنیشی ضرور.
افغانستان دولتی ترورچیلیککه قرشی کورهش ده فقط ناتو گه اعضا دولتلر حمایتینی جلب ایتیب گینه قالمهی، بلکه بوتون دنیا مملکتلری اینیقسه منطقه دولتلری یاردملرینی جلب ایتیشی کیرهک. گرچند سونگی آیلر دوامیده کابل بلند مرتبهلی رسمیلری بو باره ده بیر نیچه بار منطقهدهگی کوچلی دولتلر جملهدن ختای (چین)، هندوستان و روسیهگه مراجعت ایتیب، مذکور دولتلرنی افغانستانده ترورچیلیککه قرشی کورهش ساحهسیده دوام ایته دیگن سعی و حرکتلرنی عملده حمایت ایتیشلرینی سورهب کیلگنلر.
اوشبو حرکتلر معین نتیجهلر هم آلیب کیلماقده. مثال اوچون هندوستان تامانی افغانستانگه کمیده تورت حربی تیک اوچر (هیلی کوپتر) یاردم کورستدی. روسیه اون مینگته کلاشینکوف ییتکزیب بیردی. شونیگدیک ختاینینگ حربی تخنیکدن عبارت بولگن اوسکونهلری یقینده پایتخت کابل گه ییتکزیلدی. عین حالده هندوستان، روسیه و تورکیه دولتلری افغان حربیلرنی تیارگرلیکدن اوتکزیش برنامهسینی اوزلوکسیز روشده دوام ایتدیرماقدهلر. در حقیقت افغانستانده قوپاروچیلیککه قرشی دوام ایته دیگن کورهش خلق ارا سویهدهگی مهم و حیاتی کورهش بولگنی اوچون هم دنیا دولتلری یاردملرینی جدی بیر شکلده جلب ایتیش مقصدگه موافق بولهدی.
افغانستانده ترورچیلیک معماسینی فقط حربی کوچلرنی قوللب قوتلش آرقلی برطرف ایتیب بولمهیدی. مسالهنینگ باشقه تامانلریگه دقت اعتبار قرهتیش لازم. افغانستان طالبلر گه قرشی جنگنی کیسکین طرزده دوام ایتدیرگن حالده، ترورچیلرنی حمایت ایته دیگن تامانلرگه محکم باسیملر اوتکزیش، جنگریلر نینگ مالیه له یدگن منبعلرنی قوروتیش هم اوزیگه خاص اهمیت کسب ایتهدی. عکس حالده افغانستان ایچکریسیده اوروش و ترور هجوملری نامعلوم مدتگه قدر دوام ایتیشی ممکن.
دنیانینگ ایریم دولتلری اینیقسه امریکا قوشمه ایالتلری سیاستچیلری بو مسالهگه اعتبار قره تماقدهلر. یقینده افغانستانگه سفر قیلگن امریکالیک سناتورلردن جان مککین پاکستان دولتینی ترور ترماغلری جملهدن حقانی گروهیدن اوز حمایتینی توختهتیش ضرورتی اوستیده تاکیدلب عکس حالده اسلام آبادنی دنیا دولتلری نظریدن چیتلهتیش اوچون عملی قدملر تشلشگه جدی احتیاج بارلیگینی تیلگه آلگن.
شونینگدیک امریکانینگ افغانستان و پاکستان بوییچه مخصوص وکیلی جناب فیلدمن هم رسمی اسلام آبادنی افغانستان معماسی حلی اوچون مهم بیر تامان بولگنیگه اشاره قیلیب، پاکستان رسمیلرینی بو باره ده یقیندن همکارلیک قیلیشیگه احتیاج بارلیگی نی تکرار لهگن ایدی.
حاضرگی کونده افغانستان مسالهسی دنیا اوچون کته اهمیتگه ایگه. ناتو و غرب دولتلری بو بارهده بی فرق عمل قیلیشلیککه حقلی ایمسلر البته. عکس حالده افغانستان ینه بیر بار خلق ارا ترورچیلرنینگ مهم مرکزیگه ایلنیشی هیچ کیمگه سر ایمس. دنیا دولتلری منفعتلری افغانستان آرقلی بالفعل تهدیدلرگه اوچرهیدی. هر حالده دنیا مسالهسینینگ قلتیس لیگینی یخشی انگلهیدی. بناً وارسا ییغینیده کیلهسی ییللر اوچون افغانستانده ترورچیلیککه قرشی کورهش آلیب باریش بارهسیده مهم قرار لر قبول قیلینیشی کوتیلهدی.
