آسیا یورهگی کنفرانسی نینگ آلتینچی ییغینی یکشنبه (14 قوس) هندوستان نینگ امرتسر شهریده اوتکزیلدی. مذکور ییغینده 40 مملکت نمایندهلری اشتراک ایتگن ایدیلر. کنفرانس افغانستان جمهور رییسی محمد اشرفغنی و هندوستان باش وزیری نریندرا مودی چیقیشلری بیلن آچیلدی.
آسیا یورهگی کنفرانسی نینگ آلتینچی دور ییغینی نینگ باش موضوعی ترورچیلیککه قرشی کورهش همده منطقه آقتصادینی رواجلنتیریش مسئلهسی گه قرهتیلگن ایدی. افغانستانده برقرارلیکنی تامینلش همده افغانستان حکومتی و خلقی گه مملکت اقتصادینی رواجلنتیریش بارهسیده یاردم کورسهتیش خصوصیده هم هر تامانلمه بحث ایتیلدی.
افغانستان جمهور رییسی محمد اشرفغنی افغانستاننی ترورچیلیککه قرشی کورهش نینگ بیرینچی چیزیغیده تورگنینی تاکیدلب، افغان حربیلرینی قوپاروچی گروهلرگه قرشی ددللیک بیلن جنگ قیله یاتگن لیکلرینی تاکیدلهدی. غنی شونینگدیک، پاکستاننی افغانستانده تینچلیک تامینلنیشی همده ترورچیلیککه قرشی کورهشده صمیمی همکارلیک قیلمه یاتگن لیککه عیبلهدی.
جناب غنی مملکتینی بیش ییلدن سونگ انرژی ساتیب آله دیگن مرکزدن انرژی ساته دیگن بیر مملکتگه ایلنیشی بارهسیده بشارت بیریب، افغانستان نینگ سوو منبعلری بو مملکتنی منطقه دولتلری ارا اهمیتینی آشیرهدی دیدی. افغانستاننی 24 میلیارد مکعب سوو ذخیرهلریگه ایگه مملکت ایکنی تاکیدلنهدی.
مذکور کنفرانس جریانیده افغانستان جمهور رییسی هندوستان باش وزیری بیلن ملاقات قیلگن. ایکله تاماننی هندوستان و افغانستان ارا هوا دهلیزینی تاسیس ایتیشی اوستیده اوز ارا کیلیشب آلگن لیکلری باره سیده هم خبر بیریلدی. اوشبو هوا دهلیزی آچیلیشی نتیجهسیده افغان سوداگرلر مملکتده ییتیشتیریله دیگن قول صناعتی محصولاتلری اینیقسه قالین همده میوه محصولاتلرینی هندوستانگه ییتکزیش لیککه امکان تاپه دیلر.
اوشبو محصولاتلرنی هندوستان آرقلی دنیا نینگ باشقه بازارلریگه ییتکزیلیشی ممکن لیگی هم ایتیلهدی. افغانستان تاجرلری بوندن آلدین تجاری توارلرنی چیت ایلگه ساتیش اوچون فقط پاکستانگه قرهم بولیب قالگنی اوچون جدی معمالر بیلن دوچ کیلگنلر. افغانستان و هندوستان ارا هوا آرقلی اقتصاد دهلیزی آچیلیشی افغان سوداگرلرنینگ پاکستان بندرگاهلریگه بولگن احتیاجلرینی انچه کمهیتیرهدی.
افغانستان جمهور رییسلیگی سرایی تامانیدن ترقهتیلگن خبر نامهده قید ایتیلیشیچه، نریندرا مودی هندوستاننی افغانستاننی هر تامانلمه حمایت ایشیلیککه دوام ایتیشینی تاکیدلهگن. او مملکتینی افغانستان نی تعلیم و تحصیل، زراعت، بلیغ ییتیشتیریش، ستلایت، سوو تیزیمینی ترتیبگه سالیش، علاقهلر و ترورچیلیککه قرشی کورهش ساحه سیده یاردم کورستیشینی تیلگه آلدی.
مودی شونینگدیک افغانستان و هندوستاننی مشترک خطرلر تهدید ایته یاتگنیگه اشاره قیلیب، رسمی دهلینی چابهار بندرگاهیده ینگی تاسیسات برپا ایتیش اوستیده جدی بیر شکالده فعالیت آلیب باره یاتگنینی بیلدیردی. مودیگه قره گنده هندوستان حکومتی افغان سوداگرلر گه بیش ییللیک ویزه بیرهدی و دیپلوماتیک پاسپورتلری بولگن افغانستانلیکلر ویزه سیز هندوستانگه سفر قیلیش امکانیگه ایگه بولهدیلر. عین حالده او مملکتی نینگ افغانستانگه وعده بیرگن بیر میلیارد دالرلیک یاردمینی کیرهکلی ساحهلرده صرفلش اوچون هندوستانلیک متخصصلرنی افغانستان حکومتی گه یقیندن مصلحت بیریشلرینی هم تاکیدلهدی.
آسیا یورهگی نینگ آلتینچی کنفرانسی افغانستانده برقرارلیکنی تامینلش همده افغانستان اقتصادینی رواجلنتیش سَری تشلنگن باشقه قدم حسابلنهدی. مذکور کنفرانسده قتنشگن تامانلر اوز وعدهلریگه عمل قیلگنلریده اوشبو ییغین قرارلری افغانستان دولتی و خلقی روپه رو بولیب تورگن معمالرنی ییچیش اوچون عملی نتیجهلر آلیب کیلیشی گه امید باغلسه بولهدی.
افغانستان و هندوستان مناسبتلری سونگی آیلری ایچیده مثلی کوریلمهگن درجهده مستحکم لنگن. هندوستان بوندن آلدین هیچ بیر زمان افغانستانگه حربی یاردم کورستمهگن ایدی. بیرینچی مرته کیینگی آیلر ایچیده هندوستان تامانیدن افغانستان حربی کوچلریگه بیریلگن تیک اوچرلر جنگ جبههلریده اشتراک ایتدی.
افغانستان حکومتی گه قرهشلی منبعلر هندوستاننی افغانستانگه باشقه تیک اوچرلر یاردم کورستیشی بارهسیده هم وعده بیرگن. حاضرگی کونده کمیده ییگیرمه مینگ کیشی افغانستانلیک محصللر هندوستان نینگ ایریم شهرلریده لسانس، ماسترلیک همده دوکتورلیک سویهسیده تحصیل آلماقدهلر.
