ولسمشر محمد اشرف غني وايي، چې د کندوز، فاریاب او هلمند ولایتونو په څېر پېښې به تر یوې مودې دوام ولري.
غني تېره ورځ ماښام ناوخته د (اکټوبر په ۲۰مه) د فارغو شویو افسرانو په غونډه کې وینا کوله ووېلې، چې افغانستان به تر یوې مودې پورې د وسله والو طالبانو له بریدونو سره مخ وي.
ولسمشر دغه خبرې په داسې کې کوي، چې طالب اورپکو څه موده وړاندې د یوه برید په ترڅ کې کندوز ښار ونیاو او همدا ډول وړمه ورځ د فاریاب ولایت غورماچ ولسوالي هم طالبانو ونیوله او طالب وسله والو په هلمند ولایت کې هم نښتې پیل کړي دي.
ولسمشر وویل، چې د دغو ستونزو د حل یواځنۍ لاره یووالی دی او زیاته کړه، چې د "دښمن" پر وړاندې د حکومت مشرانو بریا "سیاسي همدلي" ده.
نوموړي د افغانستان اوسني حالت ته په اشارې سره وویل، چې افغانستان د نړۍ یواځنۍ هېواد نه دی، چې نړیوالو مرستو ته اړتیا لري، بلکې جاپان او چین هم له داسې کړکېچن حالت څخه تېر شوي دي.
غني د دغو هېوادونو د پرمختګ په اړه وویل، چې مشرانو یې د هېواد اوږدمهالو ګټو ته پاملرنه کوله.
ولسمشر غني په افغانستان کې امریکايي ځواکونو د پاتې کېدو پرېکړې هرکلی وکړ او دغه یې یوه تاریخي پرېکړه وبلله.
غني په افغانستان کې د نړیوالو ځواکونو پاتې کېدو لامل له نړیوالې ترهګرسره مبارزې وبلله.
ده همداراز وویل، چې افغانستان د نړۍ له هېوادونو سره د ګډو ګټو او ګډو خطرونو پر بنسټ اړیکې لري.
ولسمشر وویل، د کابل او اسلام اباد ترمنځ اړیکې یواځې د ترهګرۍ سره د ګډې مبارزې پر بنسټ ولاړې دي.
غني وویل، چې د سولې دروازه د هغو کسانو پر مخ خلاصه ده، چې اساسي قانون مني او زموږ د ۱۴ کلونو لاسته راوړنو ته احترام لري.
دی وایي، چې د جګړې او وینې تویولو پلوي نه یو، خو د تپل شوې جګړې پر وړاندې به د ژوند تر پایه دریږو.
ولسمشر د هېواد په بېلا بېلو سیمو کې د وسله والو طالبانو د بریدونو خبره کوي، چې په تېره یوه میاشت کې د طالب اورپکو بریدونه تر بل هر وخت زیات شوي دي.
خو له بل لوري امنیتي چاروکو په وار وار سره ویلي دي، چې وسله وال طالبان د امنیتي ځواکونو سره د مقابلې توان نه لري او طالبان د جګړې پر مهال ولسي وکړي او مېنې یې د سنګر په ډول کاروي.
