افغان ولسمشر محمد اشرف غني د المان له جمهور رییس فرانک والټر شټاین مایر سره په ولسمشرۍ ماڼۍ کې د خبرو پر مهال وویل، چې افغان دولت لیوالتیا لري، څو د جرمني موټر جوړولو کمپنیو پهواسطه د افغانستان لیتیم کانونه تشخیص کړي.
محمد اشرف غني د جرمني ولسمشر ته ویلي، چې د دوی د موټر جوړولو شرکتونه د افغانستان له دغو کانونو څنګه استفاده کولی شي.
یاده دې وي، چې تېره ورځ (پنجشنبه جولای ۱۳مه) د المان ولسمشر فرانک والټر شټاین مایر د یوه لوړ پوړي دولتي پلاوي سره په یو ناڅاپي سفر کابل ته راغی.
افغان جمهور رییس محمد اشرف غني غواړي، د جرمني پانګوال تشویق کړي، څو په افغانستان کې پانګونه وکړي او د موټر جوړولو په برخه د افغانستان له کانونو هم استفاده وشي.
د ولسمشرۍ ماڼۍ څخه په خپره شوې خبرپاڼه کې دا هم راغلي، چې هغه له خپل الماني سیال سره په خبرو کې وویل، چې د هلمند ولایت د لېتیمو کیفیت ډېر لوړ دی او د ګاډو جوړولو په صنعت کې ترې سمه ګټه اخیستل کېدای شي.
خبرپاڼه کاږي، چې د جرمني ولسمشر هم له افغان سیال سره ژمنه وکړه، چې دوی به هم په دغه برخه کې له افغانستان سره د همکارۍ په موخه غور وکړي.
د ویلو ده، چې د المان جمهور رییس والټر شټاین مایر په قزاقستان کې له یوې غونډې وروسته افغانستان ته راغی او له ولسمشر محمد اشرف غني مخکې یې د بلخ ولایت په مزار شریف ښار کې له خپلو سرتېرو سره ولیدل.
