غزنی ولایتی‌نینگ یشاووچی‌لری ولایت‌ده قندوز حادثه‌سی تکرار بولیشی توغریسیده آگاه‌لنتیرگن‌لر؛ اما محل مسوول‌لری همده ولایت کینگشی‌نینگ اعضالری مذکور ولایت دولت اداره‌سیدن چیقیمس‌لیگی حقیده ایشانچ بیرگن‌لر.
بوگون ایرتلب طالب‌لر بیردنگه ولایت‌نینگ اوچ منطقه‌سیگه هجوم قیلگن‌لر. حاضر غزنی شهری یریم تعطیل بولیب، کابل – قندهار عمومی یولی ترافیک یوزیگه یاپیلگن.
بوگون (یکشنبه) غزنی ولایت والی‌سی محمدامان حمیم بیر خبری ییغین‌ده ایتیشیچه، ملی کوچلر قورال‌لی طالب‌لرنینگ برچه هجوم‌لرینی بیکار قیلگن‌لر. جناب رحیمی‌گه کوره، ملی کوچلر جنگری طالب‌لرگه آغیر تلفات ییتکزیش بیلن مذکور گروه‌نی شهر اطرافی همده ولسوال‌لیک‌لردن آرقه‌گه سورگن‌لر.
غزنی ولایسی‌گه کوره، مذکور اوروش‌لر دوامیده جنگری‌لرنینگ 12 نفر اولدیریلگن و 25 کیشی‌دن آرتیق طالب یره‌لنگن. شونینگ‌دیک جناب حمیم، عصیانچی طالب‌لرنینگ پارتلاووچی ماده‌گه تولدیریلگن بیر موتری مقصدگه ییتمس‌دن آلدین نابود ایتیلگن دیگن.
ایچکی ایش‌لر وزیرلیگی سوزلاووچی‌سی بوگون کابل‌ده بیر خبری انجمن‌ده، جنگری طالب‌لر اوتگن کیچه‌دن بویان غزنی ولایتی‌نینگ آلتی منطقه‌سیگه هجوم قیلگن‌لیکلرینی ایتگن؛ اما عصیانچی‌لر ملی کوچلرنینگ جدی عکس العملی‌گه دوچار بولگن‌لر. جناب صدیقی، احتیاج سیزیلگن تقدیرده حکومت مذکور ولایت‌گه کوپراق حربی جهاز یوباریشی باره‌سیده تاکیدله‌گن.
ولایت کینگشی‌نینگ اعضالری شهر اهالیسی وضعیتی خصوصیده تشویش بیلدیرگن؛ لیکن دولت ملی کوچلری مخالف‌لرگه ضد هجوم قیلیش قابلیتی‌گه ایگه‌لر دیگن‌لر.
غزنی ولایت کینگشی‌نینگ اعضالریدن فاطمه رحیمی‌نینگ سلام‌وطندارگه ایتیشیچه، اورته‌ده معامله بولمه‌گن تقدیرده، افغان ملی کوچلری قورال‌لی طالبلرنی شکست بیریش قابلیتی‌گه ایشانه‌دی.
غزنی ولایت کینگشی‌نینگ باشلیغی خالقداد اکبری، ولایت‌گه ینگی تازه نفس کوچلر ییتیب کیلگن‌لیگی باره‌سیده خبر بیرگن.
لیکن جنگری طالب‌لر تامانی هنوزگچه بو حقده بیرار نرسه دیمه‌گن.
