د افغانستان د کورنیو چارو وزیر انورالحق علومي وویل، چې د فرخندې په ژغورنه کې ناکام شوي دي.
ښاغلي علومي نن (دوشنبې د وري ۳مه) د ولسي جرګې په ناسته کې د پوښتنو په ځواب کې وویل، چې امنیتي ځواکونو ونه شو کړای، چې فرخنده د بریدګرو له منګولو وژغوري.
۲۷ کلنه فرخنده د تېرې پنجشنبې په ورځ د بې شمېره قهرېدلو نارینه وو له خوا لومړی ووژل شوه او بیا وسوځول شوه. د فرخندې قتل په افغانستان او کابل کې د عامو افغانانو ذهنیتونه راوپارول او په پرلپسې ډول یې په ټول افغانستان کې د فرخندې لپاره د عدالت غوښتنه کړې ده.
په خپرو شویو ویډیوګانو کې لیدل کېږي، چې د فرخندې د قتل پر وخت پولیس په سیمه کې موجود دي، خو د هغې د مړينې مخنیوي نه کوي.
دغو اعتراضونو، د پولیسو اړوند زیات شمېر انتقادونه راپورته کړل. د کورنیو چارو وزارت وایي، چې د دویمې امنیتي حوزې د آمر په ګډون یې د ۱۳ تنو پولیسو دندې ځنډولي او د تحقیق لاندې نیول شوي دي.
علومي د ولسي جرګې د دوشنبې په استجوابیه غونډه کې وویل، چې د فرخندې د قتل موضوع په جدي ډول څارل کېږي. هغه زیاته کړه، تر اوسه یې د دغې پېښې د عاملینو په تور څو تنه نیولي دي.
علومي زیاتوي، چې په لومړیو کې پولیسو وضعیت مهار کړی و، خو د بریدګرو په زیاتوالي او د پېښې په ځای کې د خلکو ډېروالی د دې لامل شو، چې امنیتي ځواکونو د وضعیت کنټرول له لاسه ورکړ.
د فرخندې کورنۍ وايي، چې لور یې د عایشې صدیقي له دارالعلوم نه فارغه شوې وه او پرېکړه یې کړې وه، چې نورو زده کړو ته د شرعیاتو په برخه کې په کابل پوهنتون کې دوام ورکړي.
د فرخندې مړی تېره ورځ یو شمېر نارینه وو او ښځینه وو له خوا د (زه فرخنده یم، موږ عدالت غواړو، فرخنده ژوندۍ ده) شعارونو په ویلو سره د کابل د پنجصد فامیلو په قبرستان کې خاورو ته وسپارل شو.
نن (دوشنبه) د فرخندې د قتل ځای د کابل د خلکو له خوا د هغې لپاره د عدالت غوښتنې پر ځای بدل شوی و. د هرات او مزار یو شمېر اوسېدونکیو هم اعتراضونه وکړل او د فرخندې د قاتلانو د محاکمه کولو غوښتنه یې وکړه.
