.jpg)
دغه مرکز د عدلیې وزارت په چوکاټ کې د ټولنیز عدالت او وګړیزو حقوقو د خوندیتابه په پار جوړ شوی دی.
د عدلیې وزارت د ټلیفونونو د خدماتو د برخې مسوول محمد تمیم حیدري نن شنبې د (فېبرورۍ پر ۴مه) په کابل کې یوې خبرې غونډې ته وویل، هېوادوال کولی شي، چې په وړیا توګه د ۱۸۸ شمېرې په ډایلولو سره د حقوقي، جزايي او مدیني ستونزو په اړه مرستې او نظریات وغواړي.
په ورته وخت کې د عدلیې وزارت اداري مرستیال سید محمد هاشمي سلاموطندار ته وویل، چې دا مرکز یې هېوادوالو ته په وړیا توګه د مشورې ورکولو په موخه پرانیستی دی.
د هاشمي په خبره، د دې مرکز په جوړولو ۱،۵ میلیونه افغانۍ لګښت راغلی او ۱۰ تنه په کې کار بوخت دي.
دا په داسې حال کې ده، چې ډېر شمېر هېوادوال د عدلي او قضايي بنسټونو د اساسي دندو او مسوولیتونو په اړه معلومات نه لري؛ خو د دې مرکز له پرانېستل کېدو سره به یې ډېرې پوښتنې حل او د عامه پوهاوي کچه لوړه شي.
