د ملي یووالي حکومت اجرایوي رییس وايي، حکومت د رڼو ټاکنو کولو ته ژمن دی او د بایومټریک سېسټم کارولو په اړه به د ټاکنو کمېسیون وروستی دریځ د خلکو او سیاسي ګوندونو اندېښنې لرې کړي.
نوموړي چې د برهانالدین رباني د اووم تلین په نمانځغونډه کې خبرې کولې وویل، د ولسمشرۍ راتلونکیو ټاکنو کې نوماند نهدی او پهدې اړه پرېکړه به د خلکو په مشوره وکړي.
عبدالله زیاته کړه، د ملي یووالي حکومت باید د خلکو له نیوکو او شکایتونو سره سره تر راتلونکیو ولسمشریزو ټاکنو دوام وکړي.
په همدې حال کې د جمعیت اسلامي ګوند رییس صلاحالدین رباني وايي چې سیاسي ګوندونه د بایومټریک کارولو پرمهال راتلونکیو ټاکنو کې ګډون ته ژمن دي.
نوموړي زیاته کړه، هر هغه پلان چې ولسواکي کمزورې او بدنامه کړي، په حقیقت کې د افغانانو له ښې راتلونکې سره دوښمني ده.
بلخوا د اجراییه ریاست دویم مرستیال محمدمحقق په راتلونکیو ټاکنو د بایومټریک کارول یو ښه ګام وباله او ټینګار یې وکړ چې حکومت باید په عمل کې سیاسي ګوندونه ومني.
د ټاکنو خپلواک کمېسیون رییس عبدالبدیع صیاد تر دې وړاندې د ټاکنو په شپږمه ملي غونډه کې ویلي وو چې د ټاکنو بایومټریک کولو په اړه یې له بېلابېلو شرکتونو سره اړیکې نیولي او رایې ورکوونکي به د ټاکنو په روځ بایومټریک شي.
محمدمحقق دغه راز ټینګار وکړ چې امنیتي ځواکونه دې د سترملي اېتلاف پروړاندې له زوره کار نهاخلي.
نوموړي زیاته کړه، پهکار ده چې د اېتلاف پروړاندې له زوره کار اخیستلو پرځای، ټولې ستونزې د خبرو اترو له لارې حل شي.
دا په داسې حال کې ده چې کورنیوچارو وزارت تر دې وړاندې اعلان کړی و، که ګوندونه او سیاسي بهیرونه د ټاکنو کمېسیون ولایتي دفترونه وتړي، امنیتي ځواکونه به یې پروړاندې له زوره کار واخلي.
