افغان ولسمشر محمد اشرف غني وايي، چې د چين سياست سيمه ییز ثبات ته لاره هواروي او دغه هېواد د افغانستان د سولې او ثبات اصلي عامل دی.
اشرف غني د افغانستان او چين د دوستۍ د ۶۰ مې کليزې په نمانځ غونډه کې زیاته کړه، چې چين د افغانستان پخوانی ملګری پاتې شوی.
په دغه غونډه کې د چين د ولسمشر مرستیال " لي يوان چاو" هم ګډون درلود.
هغه نن سه شنبه (نومبر۳مه) د ځينو نورو لوړ پوړو چارواکو سره کابل ته راغی.
همدارنګه ولسمشر غني زیاته کړه، چې د افغانستان جنګ یو سيمه ییز او نړېوال جنګ دی او باید د سيمې هېوادونو په ګډون د نړۍ نور هېوادونه هم په دغه جنګ کې له افغانستان سره مرسته وکړي.
د هېواد ولسمشر دا هم وویل، چې افغانستان لومړی باید د چين په مرسته له پاکستان سره سوله وکړي او وروسته بیا د سيمې د ثبات له پاره کار وکړي.
له بل لوري د چين د ولسمشر مرستیال د خپلو مرستو پر دوام د ټينګار تر څنګ وویل، چې دوی چمتو دي، څو له افغان حکومت سره د تروریزم سره د مبارزې او سولې ثبات په برخه مرسته وکړي.
لي یوان چاو وايي، په پام کې ده د افغانستان اجرایوي مشر ډاکټر عبدالله عبدالله د شانګهای په ناسته کې ګډون وکړي او د دواړو هېوادونو په اړيکو به خبرې اترې وشي.
چين په داسې حال کې له افغانستان سره د سولې په باب د مرستو کولو اعلام کوي، چې څو میاشتې وړاندې د افغان حکومت او وسله والو طالبانو ترمنځ د خبرو اترو لومړی پړاو په پاکستان کې د چين او امريکا د استازو په ګډون ترسره شوه.
د چين او افغانستان ترمنځ د ۳ مهمو اقتصادي موافقو لاسلیک
د چین مرستیال ولسمشر چاو او ورسره راغلي پلاوي په کابل کې له افغان حکومتي چارواکو سره د امنیت، بیا رغونې او تعليم په برخو کې ۳ مهم یادښتونه لاسلیک کړل.
په یاد تفاهم ليکونو کې افغانستان ته د څلورو امنیتي سکنرونو ورکول او په کابل کې د ۱۰ زره اپارتمانونو جوړول هم شامل دي.
ولسمشر غني وویل، چې له امنیتي سکنرونو څخه به پولیس او د ملي امنیت ریاست په کابل ښار کې د خلکو او موټرو د سکن کولو له پاره کار واخلي.
هغه همداراز زیاته کړه، د چین له لوري جوړېدونکي اپارتمانونه به د شهیدانو د کورنیو غړیو او دولتي مامورینو ته ورکړای شي.
د چين هېواد له لوري به د ۱۰ زره اپارتمانونو پر جوړولو ۵۰۰ میليونه ين، چې شاوخوا ۷۹ ميليونه ډالره کيږي ولګېږي.
چين مخکې له دې ۱۸۰ میليونه ډالره د افغانستان په نظامي برخه کې او يو ميليون ډالر يې د زلزلې له امله زیانمن شویو سره مرسته کړې ده.
