اجراییه رییس عبدالله عبدالله نن د وزیرانو شورا غونډې ته ویلي، سوله باید په یوه کس پورې تړلې او محدوده نه وي، دا د یوه کس لیدلوری نه دی او په وینا یې، سوله د ټولو افغانانو غوښتنه ده.
هغه وايي، یو وزارت په هېڅ ډول نه شي کولی چې د سولې خبرې پر مخ یوسي او افغان ولس حق لري چې د سولې په اړه خپل دریځ غوره او نظر وړاندې کړي.
د ده په وینا، د سولې مرکچي پلاوی باید پراخ او ټولشموله وي.
سره له دې چې اجراییه رییس د کوم چا نوم نه دی اخیستی، خو ویلي یې دي چې په تېرو ورځو کې ناسنجول شوې خبری شوي او په وینا یې، د سولې ټول مسایل دې د یوه وزارت په محوریت پر مخ نه ځي.
په همدې حال کې د سولې په چارو کې د دولت وزارت ویاندې ناجیې انوري سلاموطندار ته وویل، یاد وزارت په مشورتي لویه جرګه کې د خلکو د استازیو په غوښتنه جوړ شوی او دا یوه اجرایوي اداره چې د سولې په برخه کې کوټلي او عملي ګامونه اخلي.
د یادولو ده چې په دې وروستیو کې د سولې په اړه د نړیوالو هڅې ګړندۍ شوي او د افغان سولی په تړاو د سوېلي اسیا لپاره د امریکا ځانګړې استازې الېس وېلز پاکستان او د پاکستان د بهرنیو چارو وزیر هم قطر ته سفر کړی دی.
د سولې په چارو کې د دولت وزارت هم څو ورځې وړاندې ویلي و چې د سولې په خبرو اترو کې د همغږۍ په موخه د ولسمشر غني په حکم یوه کمېټه جوړه شوې، څو د سولې په برخه کې د اړوندو بنسټونو او دولت ترمنځ همغږي وکړي.
اړوند مطالب:
دانش: د دولت له مالکیت پرته یو اړخیزه سوله نه عملي کېږي
