د ملي يووالي حکومت اجرایه رییس عبدالله عبدالله وايي چې د سولې د بینالاافغاني خبرو له پيل وړاندې د شرط اېښودل سولې ته د نه ژمنتیا په معنا ده.
نوموړي چې نن په کابل کې د وزیرانو شورا غونډه کې وينا کوله وویل، د افغان سولې لپاره د امریکا د بهرنیو چارو وزارت له ځانګړي استازي زلمي خلیلزاد سره یې د سولې په تړاو هر اړخیزې خبرې کړي او هغه ته یې په ډاګه کړې چې د بینالاافغاني خبرو تر پیلېدو وړاندې د تاوتریخوالي د کمېدو په برخه کې هر ترسره شوی ګام مثبت او ګټور دی.
عبدالله زياته کړې چې د بینالاافغاني خبرو د پیل لپاره باید کوم شرط نه وي او وايي چې د مذاکراتو د پیل لپاره شرط اېښودل کولای شي د خلکو غوښتنو ته د رسېدو لپاره نه ژمنتیا وښیي.
په ورته وخت کې په افغانستان کې د امریکا د سفارت په خپره شوې اعلامیه کې راغلي چې د زلمي خلیلزاد سفر پای ته ورسېد او نوموړي له افغان دولت نه غوښتنه کړې چې د بینالاافغاني خبرو لپاره یو جامع پلاوی وټاکي.
خو د سولې په چارو کې د دولت وزارت مخکې تر دې ویلي چې د بینالافغاني خبرو لپاره یې د پلاوي نوملړ چمتو دی او د خبرو له پیلېدو سره به اعلان شي.
