د حکومت اجرایوي مشر ډاکټر عبدالله عبدالله د وزیرانو شورا په غونډه کې وویل، چې د ننګرهار په اچین ولسوالۍ کې د امریکايي پوځيانو له لوري د بمونو مور یا له اټوم بم وروسته تر ټولو غټ بم غورځول پر ځای اقدام دی.
هغه زیاته کړه، چې په افغانستان کې له ترهګرو سره د همدردۍ فضا نشته او هغه کسان چې له ترهګرو سره لاس یو کوي او د هیواد ټیکاو ته زیان رسوي دوښمن بلل کیږي.
د هغه پر خبره، په دغه برید کې د داعش ډلې مهم قوماندنان او د سلګونو بېګناه افغانانو د وژنې مسوولین په نښه شوي دي.
عبدالله زیاته کړه، حکومت ته د دوښمنانو لیکې روښانه دي او هر دریځ چې دا لیکه ګډوډ کړي هغه د هېواد له ګټو سره په ټکر کې دی.
د ننګرهار اچین ولسوالۍ کې د بمونو مور کارول په هیواد کې دننه بیلابیل غبرګونونه راپارولي دي.
د افغانستان پخواني ولسمشر حامد کرزي د امریکې دغه کار غندلو ترڅنګ حکومتي مشران په ملي خیانت تورن کړي دي.
د رپوټونو پر بنسټ په دغه برید کې شاوخوا ۱۰۰ داعش وسله وال وژل شوي دي.
