اجرایه رییس عبدالله وايي، چې په ټاکنیز نظام کې د اصلاحاتو کمېسیون د چارو ټاکل او د برېښنايي تذکرو وېش د ملي یووالي حکومت له دوو لویو ژمنو ځنې وې، چې د عملاً پیل شوې.
عبدالله تېره ورځ د (اګست پر ۵مه) د هرات ولایت د کشک کهنه او رباط سنګي ولسوالیو له مشرانو سره د لیدنې پر مهال وویل، چې د ملي یووالي حکومت د دغو دوو لویو ژمنو د عملي پيل سیاسي او ټولنیز عدالت ته لاره هواروي.
اجرایه رییس عبدالله عبدالله تېره ورځ د بریتانیا له دفاع وزیر سره په خبرو کې وویل، چې په ټاکنیز نظام کې د سمون کمېسیون رامنځته کېدل د خلکو، نړیوالې ټولنې د باور تر لاسه کول او د ټاکڼو د روڼتیا لامل کېږي.
وزیرانو شورا پرېکړه وکړه، چې د برېښنايي تذکرو ازمایښتي وېش به د زمري میاشتې په ۲۸مه چې د ( دازادۍ ورځ ده) پيل شي.
وزیرانو شورا دغه پرېکړه څو ورځې مخکې کړې وه. د دې پرېکړې پر بنسټ ټاکل شوې ده، چې د برېښنايي تذکرو د پیل لومړی پړاو به له پلازمېنې او د دویم پړاو پیل به له ولایتونو څخه وشي.
د برېښنايي تذکرو د وېش پروګرام د کورنیو چارو او د ټکنالوژيکي معلوماتو او مخابراتو وزارت له خوا، وزیرانو شورا ته وړاندې شوه.
په ټاکنیز نطام کې د سمون کمېسیون هم دوه اونې وړاندې په چارو پیل وکړ
او په ۳ میاشتو کې به په ټاکنیز نظام کې د سمون راوستلو لپاره حکومت خپل وړاندیزونه وړاندې کړي.
د ملي یووالي حکومت په سختو شرایطو کې چارې پیل کړې
اجرایه رییس تېره ورځ د فراه ولایت له مشرانو او سیاستوالو نیوکو ته په ځواب کې وویل، چې د ملي یووالي حکومت په سختو شرایطو کې په کار پیل وکړ.
په دغې ليدنه کې د فراه ولایت مشرانو وویل، چې د ملي یووالي حکومت د خلکو ستونزو او غوښتو ته لاس رسی نه دی کړی، زیاته یې کړه، چې ولسونو په سختو حالاتو کې د برخلیک ټاکلو لپاره رایه ورکړه، خو سره له دې خلکو خپلو روا غوښتونو ته نه دي رسېدلي.
عبدالله په دې اړه خلکو ته وویل، چې د تېرو څوو کلونو سیاسي، مالي، امنیتي ستونزو او قانون ماتونې د دې لامل شوې دي، چې د ملي یووالي حکومت له ستونزو سره مخ کړي.
ده زیاته کړه، چې حکومت په دې لټه کې دی، چې مرحله په مرحله د خلکو غوښتنو ته ځواب ووايي. ده ټینګار وکړ، چې حکومت به د خلکو سره د کړو ژمنو د پوره کولو لپاره ټوله هڅه وکړي.
