حکومت اجراییه باشلیغینینگ ایتیشیچه، جلریزده یوزبیرگن واقعه مملکت یشاوچیلرینینگ فکریگه سوراق توغدیرگن و بو واقعهگه قولی بولگن کیشیلر تانیلیب، جزالنیشی ممکن.
حکومت اجراییه باشلیغی عبدالله عبدالله نینگ، دوشنبه کون وزیرلر کینگشی ییغینیده ایتیشیچه، محلی پولیس کوچلری بیرینچی خط ده تورهدی و باشقه امنیتی کوچلر تامانیدن اولرگه یاردم بیریلیشی لازم.
اجراییه باشلیغیگه کوره، جلریزده یوزبیرگن واقعهگه محلی پولیس کوچلریگه یاردم بیریلمهگن و بو کوچلر توانی باریچه اوروشگن و اوندن کیین طالبلر تامانیدن اولدیریلگن.
عبدالله نینگ ایتیشیچه، بو مسئله جودههم جدی بولگن، اوتکن کون امنیت کینگشی بو قضیهنی آچیقلش اوچون کمیسیون ایجاد ایتکن و بو کمیسیون واقعهگه قولی بولگن کیشیلرنی تانیب آلهدی.
اوتکن هفته چهارشنبه کیچه، میدان وردک ولایتی جلریز تومنیده امنیتی کوچلر و طالبلر اورتهسیده یوزبیرگن توقنهشووده 24 محلی پولیس طالبلر تامانیدن اولدیریلگن، اوشبو محلی پولیس کوچلر نیچه ساعت طالبلر بیلن اوروشگن و 200 کیلومترلیگیدهگی نظمعامه پولیسی تامانیدن اولرگه یاردم بیریلمهگن.
جلریزدهگی محلی پولیس کوچلرینینگ تلفاتی، امنیتی کوچلر دقت سیزلیگی، مملکت بویلب جدی تنقیدلرگه دوچ کیلدی.
اجراییه باشلیغینینگ ایتیشیچه، رسمیلردن جلریزده یوزبیرگن واقعه توغریسیده جواب بیریش لرینی سورهگن. اونینگ ایتیشیچه، اوشبو رسمیلر ایسلنگن واقعه توغریسیده خلق برابریده جواب بیرهدی.
عینحالده، جلریز واقعهسیدن قالگن لردن بیری علی ربیعینینگ ایتیشیچه، توقنهشوو جریانیده نیچه مرته امنیتی رسمیلر، اجراییه ریاستی و مدافعه وزیرلیگی بیلن علاقه قورگن، بیراق ایستکلری جواب سیز قالگن.
اونینگ ایتیشیچه، 13 ساعت قمراوگه قالیب، امنیتی پوستهلر قولدن کیتگنیدن کیین، 37 همراهسی هلاک بولگن.
بیراق، بیرقطارلر جلریزده یوزبیرگن واقعهنی امنیتی رسمیلر دقت سیزلیگی دیب بیلهدی. میدان وردک والیسی حیاتالله حیاتنینگ ایتیشیچه، جلریز تومنیدهگی امنیتی کوچلر دقت سیزلیگی باعث محلی پولیس کوچلری تلفات بیرگن.
عین حالده، جمهور رییسنینگ ایتیشیچه، طالبلرنینگ بو ایشی جواب سیز قالمهیدی. جمهور رییس بو مطلبنی بیان ایتیب، طالبلرنینگ بو ایشینی اوروش جنایتی دیدی.
جناب غنینینگ یکشنبه کون وزیرلر کینگشیده ایتیشیچه، جلریزده یوزبیرگن واقعهنی آچیقلش اوچون کمیسیون ایجاد ایتکن و بو کمیسیون اوچ کون ایچیده امنیتی پوستهلر قنقه قولدن کیتگنی و محلی پولیس کوچلر تلفاتی توغریسیده معلومات قولگه کیریتیب اونگه گزارش بیرهدی.
شونینگدیک مملکت امنیت کینگشی، امنیتی کوچلر اورتهسیده اویغورلیک ایجاد ایتیلیشی اوستیگه تاکیدقیلگن.
