حکومتي چارواکي او ولسي خلک د دوو میاشتو په تېرېدو لا هم نه دي توانېدلي چې د کونړ ولایت په وټه پور ولسوالۍ کې د داعش او نورو وسلهوالو ډلو له لوري د پولیو بند کړی شوي واکسین کمپاین بیا پیل کړي.
د کونړ د عامې روغتیا رییس ډاکتر عزیز الرحمان ساپي سلاموطندار ته وویل، چې داعش او نورو وسلهوالو ډلو د وټه پور ولسوالۍ په کټار، ګمبیر، کلا، قرو، کرونګ، څانګار او ځینو نورو سیمو کې دوه میاشتې مخکې د ماشومانو ګوزڼ یا پولیو واکسین پر کمپاین بندیز لګولی.
ښاغلی ساپی زیاتوي اوسمهال په کونړ کې روغتیایي رضاکاران له پنځو کلونو کمعمره شاوخوا ۱۶۸ زرو ماشومانو ته د پولیو څاڅکي تزریقوي، چې له دې شمېره ۱۳ نیم زره ماشومان له واکسینه پاتې کېږي.
د کونړ د عامې روغتیا رییس وایي، چې د دیني عالمانو او قومي مخورو په منځګړیتوب یې وټه پور کې د واکسینو کمپاین د بیا پیلېدنې هڅه پیل کړي، خو تر اوسه کومې پایلې ته نه دي رسېدلي.
د ماشومانو ګوزڼ یا پولیو واکسین کمپاین سبا د ټول هېواد په کچه پیلېږي؛ خو د کونړ د عامې روغتیا چارواکي هیلهمن نه دي، چې وټه پور ولسوالۍ کې د پولیو پر واکسین لګېدلی بندیز ډېر ژر لېرې شي.
د کونړ د وټه پور ولسوالۍ ۲ اوسېدونکیو د نوم نه خپرولو په شرط سلاموطندار سره په اړیکه کې په ښکاره د کومې ډلې نوم یاد نه کړ؛ خو دومره یې وويل، چې وسلهوالو د دې ولسوالۍ په ځینو سیمو کې د پولیو واکسین بند کړی دی.
دوی له وسلهوالو ډلو غواړي، چې د پولیو واکسین تطبیق ته اجازه ورکړي.
دیني عالم نجیب الله حقیار وايي، چې د پولیو واکسین چې ماشومان له عمري فلجه ژغوري، تطبیق یې د شریعت له مخې روا دی.
داعش ډلې تراوسه د هغوی له لوري د کونړ په وټه پور ولسوالۍ کې د پولیو واکسین کمپاین مخنیوي په اړه څه نه دي ویلي.
کونړ کې د داعش ډلې له لوري د پولیو واکسین مخنیوي خبرونه داسې مهال خپرېږي، چې له دې وړاندې هم یاد ولایت ته د ډېورنډ کرښې له هغې غاړې سواته راکډه شويو کډوالو او یوشمېر نورو وسلهوالو ډلو د پولیو پر کمپاین بندیزونه لګولي و.
