د هلمند ولایت د مدني ټولنو ځينې غړي وايي، چې اوسمهال د دولت له خوا نظاميانو ته ورکول شوي امتیازات نظامیانو ته نه رسيږي، بلکې سیمه ییز چارواکي يې خپلو شخصي جیبونو ته اچوي.
د یاد ولایت د مدني ټولنې مسولينو د يوې خبري غونډې پر مهال وويل، ځايي امنيتي چارواکي د هلمنديانو هغه نظامي امتيازات خپلو خلکو ته ورکوي، چې د دغه ولايت ۳۰۰ ځوانانو ته مرکزي حکومت ورکړي دي.
د دغه ولایت د مدني فعالانو یو تن مشر سردار محمد همدرد وايي، تر ۱۵۰ ډېرو هغه هلمندي ځوانانو ورته شکايت کړی، چې دغلته يې د افسرۍ له پاره ازموينه ورکړې او بريالي شوي دي.
د هغه په وینا، مرکزي حکومت د هلمند لوستو ځوانانو ته د افسرۍ د دوه کلنۍ زده کړې شپږو مياشتو په موده کې ورکوي.
سردار محمد وايي، چې اوسمهال شا وخوا ۳۰۰ هلمندي ځوانانو د افسرۍ له پاره ازموينه ورکړه او بريالي شوي دي.
هغه زیاتوي، چې د یاد ولایت امنيه قوماندان پاسوال عبدالرحمن سرجنګ او د ۵۰۵ زون قوماندان جنرال عصمت الله دولتزي دغه امتیازات په سمه توګه نه دي ویشلي او د نورو ولايتونو ځوانانو ته يې ورکړي دي.
راپورونه وايي، چې اوسمهال دوی هلمنديانو ته اجازه نه ورکوي، چې نظامي اکاډمۍ ته ولاړ شي.
همدارنګه د مدني ټولنې بل غړی اغا محمد قريشي وايي، په نظامي لیکو کې هغه کسان جذبیږي، چې د سیمې له جغرافيې سره بلد نه دي او دا به د ناامنۍ سبب شي.
دا په داسې حال کې ده، چې د کمپاینو پر مهال دواړو نوماندانو د تحول او تداوم ټيم مشر ډاکټر محمد اشرف غني او اصلاحاتو او همپالنې ټيم مشر ډاکټر عبدالله عبدالله په خپلو کمپاینونو کې خلکو د ټولنیز عدالت د تامین غوړې غوړې وعدې ورکولې، خو اوس نه يواځې دا چې د خلکو ترمنځ تامین شوی، بلکې د اجرايوي قوي حقوق هم تر پښو لاندې کيږي.
