افغانستان عالی تینچلیک کینگشی بوگون (پنج‌شنبه 27- حوت) ایلک بار گلبدالدین حکمتیار ییتکچی‌لیگی‌ده بولگن حزب اسلامی نماینده‌لری‌گه میزبانلیک قیلیب، اوچره‌شدی.
حکمتیارگه قره‌شلی حزب اسلامی افغانستان حکومتی‌نینگ مخالفی صفتی‌ده بیرینچی بولیب تینچلیک مذاکره‌سی‌گه حاضرلیک تن آلدی.
گلبدالدین حکمتیار بوندن بیر هفته آلدین افغانستان حکومتی بیلن تینچلیک مذاکره‌سی‌گه اولتیریش اوچون حاضر ایکن‌گلیگینی بیلدیرگن ایدی. حزب اسلامی حرکتی جناب حکمتیارگه اساسلب یازیگن بیانات‌ده، بو حزب حکومت‌نینگ چقیریغی‌گه ایجابی جواب بیریب، حزب اسلامی افغانستان و دنیا خلقی‌گه بو حرکت تینچلیک ایستش‌نی بلیلی قیله‌دی دییلگن.
مملکت عالی تینچلیک کینگشی‌ده بوگون توشدن سونگ اوتکزیلگن ییغین‌ده پیرسیداحمد گیلانی، محمد کریم خلیلی و ایوب رفیقی‌لر شامل حزب اسلامی حرکتی نماینده‌لیگی‌ده محمد کریم امین، همایون جریز و عبدالقدوس صافی‌لر قتنشگن ایدی.
حکمتیار رهبرلیگی‌ده‌گی حزب اسلامی نماینده‌لری ییغین‌ده تینچلیک مذاکره‌سی‌ده رسمن اشتراک قیلیش اوچون تیار ایکن‌لیک‌لرنی بیلدیریب، بو حرکت‌نینگ اساسی ایسته‌گی افغانستان خلقی‌نینگ طلبی دیگنلر.
اوشبو حزب‌نینگ نماینده‌لری تینچلیک مذاکره «افغانلر ارا» اوتکزیلیشی باره‌سیده تاکیدله‌گن‌لر. اولرگه کوره، مذکور لایحه افغانستان‌لیک‌لر ارا اوتکزیلگن حالده، کوزلنگن نتیجه ایریشیش ممکن.
حزب اسلامی نماینده‌لریدن بیری محمد کریم امین‌گه کوره، حزب اسلامی‌نینگ ایستک‌لری « افغانستان خلقی‌نینگ طلبی دیر افغانستان خلقی ملی حاکمیت، عدالت، اسلامی قانون، اقتصاد، سیاست و اجتماعی تینگ‌لیک‌نی ایستیدیلر»
حزب اسلامی یوقاری مرتبه‌لی رسمیلرینی خوش قرشیله‌گن مملکت عالی تینچلیک کینگشی‌نینگ رسملری، بوحزب تینچلیک مذاکره‌ده اشتراک قیلیشی افغانستان خلقی اوچون امید ایشیگی آچیلگن‌لیگی‌نی تیلگه آلگن‌لر.
کینگش کاتب‌لیگی‌نینگ باشلیغی ایوب رفقی‌گه کوره، عالی تینچلیک کینگشی‌گه حزب اسلامی حرکتی‌نینگ صلاحیت‌لی نماینده‌لری کیلیشی اوچ ییل "جیملیک"دن کیین بو کینگش اوچون ییریک یوتوق سنه‌له‌دی.
