طالبلر گروهی بیر خبرنامه ترقهتیب، اوشبو حرکتنینگ سابق رهبری ملاعمرنینگ اوغلی و ایناغهسی طالبلرنینگ ینگی رهبری ملااختر محمد منصوردن بیعت قیلگنلیگی بارهسیده خبر بیرگن.اوشبو خبرنامهگه کوره، ملاعمرنینگ اوغلی و ایناغهسی ملاعبدالمنان و مولوی محمدیعقوب بوگون (چهارشنبه) ملامنصور قوشیمچه طالبلرنینگ بلند مرتبهلی قوماندانلری حضوریده ملاعمر خانهدانی نمایندهلیگیده ملامنصوردن بیعت قیلگنلر.
اما، اولرنینگ بو ییغینی قهییرده اوتکزیلگنلیگی انیق ایمس و مذکور اولتیریش جریانیدن تصویر یا- ده بیرار ویدیو لوحه نشر بولمهگن.
خبرنامهده کیلیشیچه، ملاعمرنینگ اوغلی و ایناغهسی خانهدانی بیلن مصلحت اوتکزیش اوچون بیعت زمانی کیچیکتیریلگنلر.
شونینگدیک اولرنینگ سوزلریگه قرهگنده، بوندن بویان طالبلرنینگ ینگی رهبری بیلن همکارلیک قیلیب و بو یولده «قربانلیک و فداکارلیک» بیریشدن دریغ قیلمیدیلر.
خبرنامهده یازیلیشیچه، عبدالمنان و محمدیعقوب قوراللی طالبلرنینگ جنگریلریدن مخالفتگه پایان بیریب طالبلر صفتیده دایمی قالیشلرینی سورهگن. عین حالده هنوزگچه بیعت مسالهسی اوچون ملا عمر خانهدانینی کوتگنلردن ملامنصوردن بیعت قیلشلری طلب قیلینگن.
شوکبی مذکور اولتیریشده ملامنصور قوراللی طالبلر بلند مرتبهلی اعضالریگه اوشبو گروه اوچون آلینهدیگن مهم قرارلر بارهسیده ملا عمر عیالهسی بیلن مصلحت بولیشی حقیده ایشانچ بیرگن.
عین حالده پاکستان عاموی اخبارات واسطهلری اوتگن کون (سهشنبه) بو مملکت باش زویرینینگ ملی امنیت مصلحتچیسی سرتاج عزیزگه اساسلب گزارش قیلیشیچه، پاکستان دولتی افغانستان تینچلیک مذاکرهلری قیتهدن باشلهنیشی اوچون سعی وحرکت قیلهدی.
جناب عزیزنینگ پاکستان سنا مجلسیده ایتیشیچه، تینچلیک مذاکرهلری قیته باشلهنیشی افغانستان دولتینینگ ارادهسی همده ایستهگیگه تیگیشلی.
سرتاج عزیزنینگ مذکور اظهاراتلریدن سونگ، طالبلر گروهینینگ سوزلاووچیسی ذبیحالله مجاهد، ملامنصور دستلب اوز قدرتینی مستحکملب سونگ افغانستان دولتی بیلن مذاکره قیلیشگه تیار بولهدی دیگن.
قوراللی طالبلر ایچیدهگی موجود قرمه – قرشیلیکلر طالبلرنینگ سابق رهبری ملاعمر وفات قیلگندن سونگ، اوشبو حرکتنینگ ایریم اعضالری ملامنصورنی ملاعمر اورنیگه تعین قیلدیلر؛ اما بو حرکت طالبلر رهبرینینگ ایریملری مخالفتیگه سبب بولدی.
اوشبو مددت ایچیده ملامنصور طالبلر گروهینینگ ناراض اعضالری کونگلینی آلیشگه اولگوردی. بوندن نیچه کون آلدین پاکستان عاموی اخبارات واسطهلری طالبلرنینگ ینگی رهبری بو گروهنینگ قطر دفتری اعضالری کونگلینی کوتاریش اوچون دوحهگه هیأت یوبارگنی بارهسیده گزارش بیرگن ایدی.
عین حالده، لیکن هنوزگچه هم ملامنصور قندهی قیلیب ملاعمرخانهدانی اعضالرینی بیعت اوچون کوندیرگن لیگی خصوصیده انیق معلومات قولده ایمس.
