فاریاب ولایتی گورزیوان تومنیی نینگ محلی رسمیلری طالبلر یوروشی و مذکور تومن قیشلاقلریدن اوشبو گروه قولیگه سقوط قیلیشیدن خبر بیرهدی. مسؤوللرنینگ ایتیشیچه، حکومت طالبلرهجومی خنثی بولیشی اوچون بیر ایش قیلمسه، تومن مرکزی اوشبو گروه قولیگه توشیشی ممکن.
گورزیوان تومنی نینگ باشلیغی عبدالرزاق کاکرنینگ سلاموطندارگه ایتیشیچه، بوگون (چهارشنبه) ایرتهلب 600 طالب ملا شعیب، ملا احمدشاه و قاری جیلان باشلیغیده، بیر پاکستانلیک شیخ بیلن توپ، هاوان و راکت قوراللریگه جهازلنگن حالده، تومن شرق و غرب تامانلریدن هجوم اویوشتیریب، تومن مرکزی 40 کیلومتر اوزاغدن 4 کیلومترلیگیگه اوزلرینی ییتکیزگنلر.
کاکرنینگ ایتیشیچه، شوحاضر طالبلر کیکاووس، قزاق، فریش، شش قره، غال نمک و جوز درهسی قیشلاقلرینی تصرف قیلگن. گورزیوان سرپرستیگه کوره، مذکور گروه تومن مرکزیده هجوم قیلیب دولتی تأسیساتلرنی نابود قیلیش قصدیگه.
کاکرنینگ ایتیشیچه، نیچه پیتدن بویان گورزیوان پولیس باشقرووچیسی یوق و 60 پولیسدن 45 تهسی ایشلرینی ترک قیلگنلر. اونینگ کوپهیتیریشیچه، طالبلر فکری اوروشلری بیلن مرکز قیرغاغلریگه قدر نفوذ قیلگنلر و شو حاضر مردمی کوچلر اولرگه قرشی تورگن. گورزیوان سرپرستی شوحاضرگه قدر تومن امنیتی قیینچیلیکلری ولایت رسمیلریگه ایتیلگن، اما حاضرگه قدر قیسی بیر جواب اولردن آلمهگن.
حاضرگه قدر بوبارهده طالبلر بیرنرسه دیمهگن.
شونینگدیک جنگری طالبلر اوتگن کون کیش قورونده، فاریاب ولایتی پشتونکوت تومنی نینگ کلنی، تکلی و هزار سم منطقه لرینی آلگنلر.
اوتگن هفته طالبلر قندوز شهریده گروهی هجوم اویوشتیریشلری بیلن 3 کونگه قدر شهرنی آلدیلر؛ اما افغانستان خوفسیزلیک کوچلری ناتو هوایی یاردمی بیلن، قندوز شهرینی قیته تصرف قیلدیلر. امنیتی مسؤوللرگه کوره، قندوز شهری طالبلر قولیگه توشیشی بیلن بوگروه روحیه آلیب، فاریاب، بدخشان، بغلان و غزنی ولایتلریده هم هجوم اویوشتیرگنلر.
