بغلان امنیتی رسمی‌لری، مذکور ولایت‌ده حربی عملیات یکونلنیشی‌دن خبر بیره‌دی، بیراق بغلان یشاوچی‌لری، منطقه‌لریده طالب‌لرنینگ کینگ حضوریدن خواطر بیلدیریب ایتیشیچه، محلی حکومت تازه‌لنگن منطقه‌لرنی سقلش‌گه چاره تدبیر کورمه‌گن و طالب‌لر اوشبو منطقه‌لردن ایریم قسمت‌لرینی قیته‌دن نظارت‌گه آلگن.
بوگون «سه‌شنبه» مملکت شمالی‌ده حربی کوچلر مسؤول‌لری، ایکی آی آلدین، مذکور ولایت‌نی عصیانچی‌لردن تازه‌لش نیتی‌ده یولگه قوییلگن «نوید بیر» ناملی حربی عملیات یکونلنیشی‌دن خبر بیردی.
بغلان یشاوچی‌لریدن بیرقطاری‌نینگ سلام‌وطندارگه ایتیشیچه، اوشبو عملیات‌دن راضی‌لر، بیراق حاضرگه‌قدر، دندغوری و دندشهاب‌الدین منطقه‌لریده طالب‌لرنینگ کینگ حضوریدن خواطر بیلدیره‌دیلر. اولرنینگ، خواطر بیلدیریشیچه، عملیات یکونلنگنی‌دن کیین، طالب‌لر تازه‌لنگن منطقه‌لرنی قیته‌دن نظارت‌گه آله‌دیلر.
اوشبو یشاوچی‌لر، حکومت‌دن بغلان ولایتی بوتونله‌ی عصیانچی‌لردن تازه‌لنگونگه‌قدر، حربی عملیات دوام ایتیشی‌نی سوره‌یدیلر.
عین حالده، بغلان‌ده ملی حربی عمومی قومندانی دگر جنرال عبدالحمید حمیدنینگ ایتیشیچه، اوتگن ایکی آی جریانیده امنیتی کوچلر «نوید بیر» عملیاتی نتیجه‌سیده، مرکزی بغلان تومنی، سرخ کوتل و چشمه‌شیر منطقه‌لریده 70 دن آرتیق قیشلاق‌نی طالب‌لردن تازه‌له‌گن و بو عملیات‌ده 239 جنگری طالب هلاک بولگن و باشقه 209 جنگری یره‌لنگن.
