طالبان گروهی نینگ الفتح آتلی بهاری عملیاتی باشله‌نیشی بیلن قندوز، بغلان، غور، ننگرهار، تخار و بادغیس ولایت‌لریده اوروش شدتلنگن.
بوگون ایرته طالبان گروهی نیچه تاماندن قندوز شهری و چهاردره تومنی اوستیگه هجوم قیلگن.
سلام‌وطندارگه صحبت بیرگن قندوز پولیس قومندانلیگی سوزلاوچیسی انعام‌الدین رحمانی نینگ ایتیشیچه، حاضر قندوز شهری نینگ چرخاب منطقه‌سی و زرخرید قیشلاغیده طالبان گروهی و امنیتی کوچلرنینگ آره‌سیده قتیق شکلده آتیشمه دوام ایتماقده.
طالبان گروهی نینگ هجومی دن شاشینگن قندوز یشاوچیلری نینگ ایتیشیچه، حکومت دقت‌سیزلیک قیلگن صورتده، قندوز شهری ینه-ده طالبان گروهی نینگ قولی گه سقوط قیله‌دی.
قندوز حوزه‌یی کسلخانه‌سینی باشلیغی نعیم منگل نینگ ایتیشیچه، آتیشمه باشلنگنیدن بویان 39 یره‌دار و 6 جسد مذکور کسلخانه گه آلیب کیلینگن.
شونینگدیک، بغلان ولایتی بوگون امنیتی کوچلر و طالبان گروهی نینگ آره‌سیده یوز بیرگن آتیشمه‌لرگه گواه بولگن. آتی فاش ایتیلیشی‌نی ایستمه‌گن امنیتی بیر منبع نینگ سلام‌وطندارگه ایتیشیچه، طالبان گروهی نینگ بهاری عملیاتی باشله‌نیشی بیلن مذکور گروه نینگ جنگریلری بغلان ولایتی نینگ ایریم منطقه‌لریگه هجوم قیلگن و آتیشمه‌لر نتیجه‌سیده 8 امنیتی عسکر هلاک ایتیلگن.
عین حالده، بغلان ولایت کینگشی باشلیغی محمدصفدر محسنی، طالبان گروهی نینگ بوگونکی هجوملری نتیجه‌سیده امنیتی کوچلرگه آغیر زیان ییتیشگنینی تصدیق‌لیدی.
شونینگدیک، غور ولایتیده طالبان گروهی نینگ پیستیرمه‌سیده پولیس کوچلری نینگ عملیاتی قطعه قومندانی شامل 7 کیشی هلاک و باشقه 3 کیشی یره‌لنگن.
غور حاکمی سوزلاوچیسی عبدالحی خطیبی نینگ ایتیشیچه، طالبان گروهی بو هجوم ده امنیتی کوچلرنینگ اوچ عراده انترنشنل، بیر هاموی تانکی و بیر رنجری نی اوت بیرگن.
عین حالده، ننگرهار ولایتیدن ییتیشگن خبرگه کوره، مذکور ولایت نینگ شیرزاد تومنی اوستیگه طالبان گروهی تامانیدن اویوشتیریلگن هجوم ده 27 جنگری طالب هلاک ایتیلگن. ننگرهار حاکمی دفتری تامانیدن نشر ایتیلگن خبرنامه ده کیلیشیچه، آتیشمه بوگون ایرته گچه دوام ایتگن و نتیجه‌ده 27 جنگری طالب هلاک و باشقه 32 جنگری طالب یره‌لنگن.
شونینگدیک، جوزجان، تخار و بادغیس ولایت‌لریده امنیتی کوچلر و طالبان گروهی آره‌سیده یوز بیرگن آتیشمه‌لر نتیجه‌سیده ایکی تامان گه زیان ییتیشگن.
