ملی خوفسیزلیک کینگشی نینگ ایتیشیچه، طالبان دولت محبوسلرینی مذکور گروه گه تاپشیریلگن رویخط اساسیده قوییب یوبارمهگن. مذکور نهاد ایکی هفته آلدین کابل ده دولت محبوسلری نینگ رویخطی نی طالبان گروهی نی فنی هیأتی گه تاپشیرگن ایدی.
بوگون (شنبه 30- حمل) ملی خوفسیزلیک کینگش سوزلاوچیسی جاوید فیصل خبری بیر ییغین اوتکزیب ایتیشیچه، طالبان آرقهلی قوییب یوباریلگن محبوسلردن کوپینچه سی تینچاهالی دیر و اولردن یالغیز 19 تهسی دولت محبوسلری دیر.
اونگه کوره، قندهار ده طالبان آرقهلی قوییب یوباریلگن 20 محبوسدن 4 باله شامل 10 تهسی تینچاهالی دیر.
جناب فیصل نینگ کوپهیتیریشیچه، لغمان ده طالبان آرقهلی قوییب یوباریلگن 40 محبوسدن 9 تهسی امنیتی کوچلرنینگ برحال اعضاسی دیر و باشقه 12 تهسی مذکور گروه گه تسلیم بولگن عسکرلر دیر. اونگه کوره، اوشبو 12 محبوس تیکشیروو اوتکزیلگنیدن کیین کابل گه حبس بولیشی ممکن.
ملی خوفسیزلیک کینگش سوزلاوچیسی نینگ ایتیشیچه، لغمان ده طالبان قمرویدن قوییب یوباریلگن 6 کیشی امنیتی کوچلرنینگ سابق اعضاسی دیر و باشقه 3 تهسی دولت نینگ ملکی ایشلاوچیسی دیر.
جناب فیصل گه کوره، لغمان ده قوییب یوباریلگن 40 محبوسدن، 28 تهسی آمریکا و طالبان گروهی آرهسیده تینچلیک کیلیشوونامهسی امضالنگنیدن کیین اوشلب آلینگن و بیر آیدن آرتیق حبس گه بولمهگن.
او، اورغولب ایتیشیچه، طالبان امنیتی کوچلر محبوسلرینی رویخط اساسیده قوییب یوباریشی کیرهک و شونینگدیک باشقه تینچاهالی هم مذکور گروه تامانیدن قوییب یوباریلیشی کیرهک.
ملی خوفسیزلیک کینگش سوزلاوچیسی نینگ ایتیشیچه، قوییب یوباریلگن محبوسلر آرهسیده بالهلر هم بار کیم بو طالبلرنینگ قماقخانهلریده بالهلر سقلهنیشی نی کورستهدی.
ملی خوفسیزلیک کینگش سوزلاچیسی حبس ده بولگن بالهلر توغریسیده بیرلشگن ملتلر تشکیلاتی نینگ اورین باسرلیک هیأتی، قیزیل خاج و انسانی حقلر کمیسیونی دن بو توغریده اقدام قیلیشلرینی سورهیدی.
طالبان حاضرگچه بو توغریده فکر بیلدیرمهگن.
ملی خوفسیزلیک کینگش سوزلاوچیسی گه کوره، طالبان محبوسلرینی قوییب یوباریش پروسه توختهتیلمهگن و مذکور گروه نینگ 1500 محبوسی جمهوررئیس غنی نینگ بویروغی اساسیده قوییب یوباریلهدی.
حکومت (20- حمل) ده طالبان محبوسلرینی قوییب یوباریش پروسهسینی باشلهدی و حاضرگچه مذکور گروه نینگ 361 اعضاسی بگرام قماقخانهسیدن قوییب یوباریلگن.
تینچلیک کیلیشوونامهسی اساسیده، افغانستان حکومتی 5 مینگ طالبان محبوسی قوییب یوبارهدی و شونینگدیک طالبان افغانستان امنیتی کوچلریدن 1000 تهسی توتقوندن آزاد قیلهدی.
ایکی تامان محبوسلری قوییب یوباریلگنیدن کیین، افغانستان حکومتی و طالبان گروهی آرهسیده تینچلیک سوزلشووی باشلهنیشی گه قرار قیلینگن.
