بغلان محلی و امنیتی منبع‌لری نینگ ایتیش‌لریچه، طالبان گروهی مذکور ولایت مرکزی پلخمری شهری اطرافیده هجوم اویوشتیرگنی باعث، مذکور گروه جنگریلری و امنیتی کوچلر آره‌سیده آتیشمه باشلنگن.
مذکور منبع‌لرگه کوره، شونینگدیک طالبان گروهی بغلان – سمنگان قتناو یولی نی باغ‌شمال و چشمه‌شیر منطقه‌سیده کیلیب-کیتیش یوزیگه باغله‌گنلر. بو آتیشمه و قتناو یول باغله‌نگنی باعث کمیده 100 یوک و یولاوچی تاشووچی موتر مذکور قتناویول نینگ ایکی تامانیده بند قالگن.
اوشبو منبع‌لرنینگ سلام‌وطندارگه ایتیش‌لریچه، مذکور آتیشمه باعث حاضرگچه اردو کوچلریدن 4 ته‌سی هلاک و باشقه 10 عسکر ایسه تن جراحتی کوتارگن. اولرگه کوره، اوشبو کوچلرنینگ 4 تانکی هم تخریب بولگن.
عین حالده اوتگن کیچه امنیتی کوچلر و طالبان گروهی آره‌سیده یوزبیرگن آتیشمه‌ده، بغلان ولایتیده اردو کوچلری نینگ 5- کندک ارکان باشلیغی محمدظاهرسرجنگ هلاک و شونینگدیک باشقه قطار عسکرلر یره‌لنگن.
بغلان ساغلیک ریاست باشلیغی محب‌الله حبیب نینگ ایتیشیچه، حاضرگچه امنیتی کوچلرنینگ 5 یره‌داری ولایتی کسلخانه گه انتقال بیریلگن کیم اولردن 2 ته‌سی نینگ ساغلیک وضعیتی یمان دیر.
عین حالده، اوروش چیزیغی گه قرار تاپگن عسکرلردن قطاری نینگ ایتیش‌لریچه، حاضر اولر و طالبان جنگریلری آره‌سیده جدی آتیشمه نی دوامی بار. مذکور امنیتی کوچلر اویغون‌سیزلیک و یاردمچی کوچلر کم‌لیگی باعث بو ولایتده طالبان هجومی کوپه‌یگن دیدی.
