په کندوز ولایت کې د طالبانو تر واک لاندې سیمو کې د یو لسم ټولګي د حرفیې مضمون پر تدریس بندیز لګولی دی.
ویل کیږي، چې د دغه مضمون په منځپانګه کې د موسیقۍ وسایلو په اړه معلومات لوستل کیږي، له همدې کبله یې پرې لوستل منع کړي دي.
د دغه ولایت د پوهنې رییس محمد ظاهر نظیم دا خبر تایېد وي، او وايي، چې د ۵ ولسوالیو او د ولایت مرکز په ګدون سربېره نورې سیمې د طالبانو تر واک لاندې دي.
نوموړی وايي، په دې ولایت کې ۴۹۵ بابه ښوونځي موجود دي، او له دې شمېر نه ۳۰۰ په هغو سیمو کې دي، چې د طالبانو تر واک لاندې دي.
د هغو سیمو زده کوونکو، چې د طالبانو تر واک لاندې دي سلام وطندار ته وویل، دغه ډله په ښوونځیو کې مداخله کوي او خپلې غوښتنې په ښوونځيوکې عملي کوي.
د کندوز ولایت د پوهنې رییس پر خبره، دوی له دې وېرې چې طالبانو تر واک لاندې سیمو کې د ښوونځیو دروازې و نه تړل شي د دغه مضمون پر نه لوستلو ټینګار کړی دی.
دی وايي، چې دغه سیمې د طالبانو ترواک لاندې دي، خو دښونځيو اکمالات د حکومت له خوا کیږي.
ویل کیږي، چې د خان اباد، دشت ارچي او قلعه ذال ولسواليو ښوونځي د ناامنیو له کبله تړل شوي دي.
د راپورونو پر بنسټ وسله والو طالبانو په غزني، لوګر، پکتیا او د ننګرهار په ولایتونو کې د ځېنو ښوونځیو دروازې تړلې وې.
