.jpg)
وسله والو طالبانو په تازه خپرې شوې اعلامیې کې لیکلي دي، چې دوی د اسیرانو د تبادلې له پاره تازه یو کمېسیون جوړ کړی دی او دغه کمېسیون دنده لري، له افغان دولت سره د جنګي اسیرانو د تبادلې پر سر بحث وکړي.
د طالبانو په اعلامیه کې راغلي دي، چې«د جنګي اسیرانو د ازادولو کمېسیون» دنده لري، د اسیرانو د ازادولو د څرنګوالي په اړه یوه اساسنامه جوړه کړي.
طالبانو ویلي دي، دوی به اسیران د موقف او جنګي شرایطو په اساس تبادله کړي.
وسله والو طالبانو ادعا کړې ده، چې د طالبانو سره د افغان دولت د اسیرانو د خلاصون له پاره هیڅ هڅه نه ده شوې او په دې برخه کې کوم پلان هم نه لري.
طالبانو د دولت د اسیرانو په اړه د ملي اردو هغو شاوخوا ۱۵ سرتېرو ته اشاره کړې ده، چې څو میاشتې مخکې په فاریاب ولایت کې د څرخي الوتکې له سقوط وروسته دوی ونیول.
.jpg)
دوی ویلي دي، چې څو ځلې یې د دغو سرتېرو د تبادلې له پاره چمتووالی ښودلی دی، خو دولت په دې برخه کې هیڅ ځواب ورته نه دی ورکړی.
طالبانو په اعلامیه کې هغه خبر رد کړی، چې دوی د قاري صلاح الدین؛ چې مخکې د طالبانو له خوا د فاریاب له پار د والي په توګه نومول شوی و، د ملي اردو له دغو سرتېرو سره یې تبادله کوي.
په ورته وخت کې د اجرایه ریاست ویاند جاوید فیصل سلام وطندار سره په مرکه کې وویل، چې طالبانو حکومت ته دغه ډول وړاندیز نه دی کړی او هیڅ وسله والې ډلې د جنګي اسیرانو د تبادلې له پاره له حکومت سره خبرې نه دي کړي.
فیصل وايي، چې افغان حکومت د اسیرانو د تبادلې په اړه مخامخ خبرو اود یو بشپړ توافق غوښتونکي دي او د اسیرانو د خلاصون له پاره به له خپلو ټولو امنیتي ځواکونو استفاده وکړي.
