د پکتیا ولایت امنیتي چارواکي وايي، چې وسله والو طالبانو د دې ولایت د میرزکې ولسوالۍ په اندام سیمه کې مرکز ګردېز ته د شپږو ولسوالیو لارې له تېرې شپې راهیسې تړلي دي.
د پکتیا ولایت د امنیې قوماندانۍ د امنیت امر سمنوال محمد ایوب وردګ وايي، چې د لارې د خلاصولو له پاره یې عملیات پیل کړي دي.
وردګ زیاتوي، چې طالبانو په لارو کې بمونه ښخ کړي او د لارو پلونه او پلګوټي یې په بمونو الوزولي دي.
دی ډاډ ورکوي، چې ډېر ژر به دغه لارې د خلکو د تګ را تګ په مخ پرانیزي.
په ورته وخت کې د سیمې خلک هم شکایت کوي او وايي، چې له تېرې ورځې راهیسې طالبانو د مرکز ګردیز او ولسوالیو لارې تړلي دي او دوی پرې تګ را تګ نه شي کولی.
دغه خلک وايي، چې په لارو کې لسګونه باردار او د سپرلۍ موټر بند پاتې دي.
په داسې حال کې وسله وال طالبان د پکتیا د شپږو ولسوالیو لارې تړلي، چې درې ورځې مخکې طالبانو د پکتیا په زرمت ولسوالۍ پراخ ډله ییز بریدونه وکړل.
