وسله والو طالبانو د یوې کورنۍ درې غړي، چې یوه یې ښځه او درې هغه یې نارینه دي؛ په عام محضر کې په دره وهلي دي.
د غور ولایتي شورا غړی عبدالرحمان عطشان سلام وطندار ته وویل، دغه کورنۍ د خپلو حقوقي ستونزو د حل په خاطر فیروزکوه ته روان وو، چې د وسله والو طالبانو له لوري وتښتول شول او بیا یې شینډنډ ولسوالۍ ته یوړل.
عطشان وايي، چې وسله والو طالبانو د دې کورنۍ هر یو غړی ۷۰ درې وهلي او بېرته یې غور ته لېږلي دي.
د غور سیمه ییزه اداره د طالبانو له خوا د دغو کسانو تښتول تاییدوي، خو د هغوی له صحرايي محکمې ناخبري ښيي.
د غور د والي ویاند عبدالحي خطیبي وايي، په دې څلورو کسانو کې یوه مېرمن، پلار، ورو او د ښځې مېړه شامل وو، چې د یو کورني جنجال حلولو له پاره له ساغر ولسوالۍ د فیروزکوه پر لور روان تلل.
خو دغو سرچینو دا څرګنده نه کړه، چې طالبانو د کوم دلیل له مخې د دې کورنۍ غړي وتښتول او بیا یې په دره ووهل.
