نن سهار(جمعه می ۵) وسلهوالو طالبانو د افغانستان کندوز ولایت پر قلعهزال او کندوز ـ تخار لويې لارې بریدونه کړي.
د کندوز ولایتي شورا غړی اسدالله سادات سلاموطندار ته وویل، چې تېره شپه د قلعهزال ولسوالۍ مرکز آقتپې باندې برید وکړ او نن سهار شاوخوا ۴ بجې يې بیا هلته پر امنیتي پوستو بریدونه کړي دي، چې تر اوسه هم د افغان ځواکونو او وسلهوالو طالبانو ترمنځ بریدونه دوام لري.
هغه وايي، د افغان ځواکونو سره هوايي مرستې هم کيږي، خو خبرداری ورکوي چې که تر نن مازدیګره نور امنیتي ځواکونه يې مرستو ته و نه رسيږي، نو په جنګ کې ښکیل امنیتي ځواکونه به ووژل شي.
د شمالختیځ برخې د پولیسو ویاند محفوظالله اکبري بیا ډاډ څرګندوي، چې دغه ولسوالي د افغان ځواکونو په کنټرول کې دی او جنګ د ولسوالۍ شاوخوا خال خال روان دی.
نوموړي زیاته کړه، چې وسلهوالو طالبانو شاوخوا ۵ بجې د کندوزـ تخار د لويې پر پرتو امنیتي پوستو بریدونه پېل کړي، چې تر اوسه هم دغه لویه لاره د ترافیکو پرمخ بنده ده.
اکبري په دې اړه د اوښتو زیانونو په اړه څه نه وايي، خو وسلهوال طالبان د یوې اعلاميې په خپرولو سره وايي، چې دوی تر اوسه د افغان امنیتي ځواکونو یو رنجر او یو هاموي ټانک له منځه وړي، چې په پایله کې يې ۸ پولیس وژل شوي هم دي.
