د هرات په کشک کهنه او کشت رباط سنګي ولسوالیو کې طالبانو د اعلامیې په خپرولو له خلکو چې د ماشیني چرګانو غوښو پېر او پلور منع دی او د خوشالۍ په محفلونو کې هم د موسیقۍ غږول بند شوي دي.
طالبانو دوی ته خبرداری ورکړی، چې که د دوی له امره سرغړونه وکړي، سخته سزا به ورکړي.
د هرات ولایتي شورا او یو شمېر اوسېدونکي بیا وايي، چې د سیمه ییزو چارواکو په ځانګړې توګه امنیتي مسوولینو نه پاملرنې له امله د طالبانو ډله په څه ناڅه امن ولسوالیو کې ځواکمنه شوې له خلکو ازادانه عشر او زکات ټولوي، جلب او جذب کوي.
د هرات د ولایتي شورا رییس کامران علیزی او د دې شورا غړی محمد فاضل عفیف جمشیدي وویل، که حالت دغه ډول دوام وکړي، ورځ تر بلې د ناامنۍ په لور ځو.
دوی وايي، په دې وروستیو کې په ولسوالیو کې امنیتي ستونزې زیاتې شوي دي او ځايي مسوولین باید په دې برخه کې جدي ګام واخلي.
د هرات د والي ویاند جیلاني فرهاد هم ځینې ادعاګاوې مني؛ وایي، چې امنیتي ځواکونه به ډېر ژر دا ستونزې لرې کړي.
دی وايي، د هرات په هرې ولسوالۍ کې ترهګرې ډلې خلک ځوروي او په بېلابېلو پلمو عشر و زکات ټولوي، خو دا نوې خبره نه ده.
د هرات د کهسان ولسوال امین الله سروري هم په ولسوالۍ کې د طالبانو تګ راتګ تاییدوي، خو وايي، طالبان دومره نه دي، چې امنیتي ځواکونو ته تم شي.
