طالبانو د کندوز ـ کابل پر لویه لاره د کندوز ولایت د علياباد ولسوالۍ په اړوند سیمو کې د مسافرو له ۳۰۳ ډوله موټره د عامه نظم ۳ سرتېري ښکته کړي او وژلي یې دي.
یوې سرچینې د نوم نهښودلو په شرط سلام وطندار ته وویل، دا سرتېرې په شخصي جامو کې د خپلو کورونو په طرف روان وو، چې طالبانو بېګا د شپې ۹ بجې د کندوز ولایت د علياباد ولسوالۍ د مدرسې په کلي کې له موټره ښکته کړي او وژلي یې دي.
له بل لوري په شمال ختیځ کې د نظم عامه د ۸مې لوا قوماندان عبدالرشید بشیر هم تاییدوي، چې طالبانو پهدې لویه لاره ۳ تنه وژلي؛ خو زیاتوي، چې تر اوسه د دې کسانو هویت نهدی معلوم، چې دا وګړي نظامي وو او که غیر نظامي.
طالبانو له درېیوو ورځو راهیسې د کندوز ـ کابل د لویه لارې د کندوز د علياباد ولسوالۍ د مدرسې په ساحه کې د پلټنې پاټک جوړ کړی او د دې لارې مسافرو نه تحقیق کوي.
