ایا د تورې چهارشنبې د پېښې ملاتړو سره به قانوني چلند وشي؟

د کابورا پروډکشن د کارکونکو پر موټر برید له زیاتو غبرګونونو سره مخ شو، چې ځېنې هېوادوالو په ټولنیزو شبکو کې دغه برید غندلی؛ خو یو شمېر نورو بیا د طالبانو له دغه بریده ملاتړ کړی.

دغو ملاتړ کوونکو په خپلو ټولنیزو پاڼو کې لیکلي دي، چې د کابورا پروډکشن کارکوونکي «فاحش او پلیت» دي؛ دوی د «امریکایانو جاسوسان» او د تېرې اونۍ په برید کې د طلوع وژل شوي کسان «مردار» بللي دي.

په ولسي جرګه کې د غزني د خلکو استازې هما سلطاني په خپله فسبوک پاڼه د طالبانو د دغه برید ملاتړ کړی دی.

سلطاني د طلوع ټلوېزیون پر کارکونکو برید او د دوی پر وژل کېدو خوښي ښکاره کړې او د برید عاملان یې فدایان بللي وو.

نوموړي په یوې خصوصي رسنۍ کې له خپلې دغه لیکنې تایید کړې ده.

په همدې حال کې د ټولنیزو شبکو ځېنې فعالانو د هما سلطاني محکمه کولو غوښتنه کړې او له امنیتي بنسټونو یې غوښتي، چې د ولسي جرګې د دې غړې څرګندونې د ملي ګټو خلاف دي.

د ولسي جرګې استازې له څرګندونو وروسته ځېنو ته دا پوښتنه پیدا شوې، چې د بیان ازادۍ کرښې تر کومه دي؟

ایا سلطاني باید د خپلې عقیدي د څرګندولو له پاره تر قانوني تعقیب لاندې راشي؟

ایا د هېواد قوانین په دې برخه کې کوم ځواب لري؟

د سیاسي چارو کارپوهه شبنم سیمیا په دې اړه سلام وطندار ته وویل، چې د «تورې چارشنبې» ورځې د پېښې قربانیانو کورنۍ او طلوع ټلویزیون کولای شي، چې د هما سلطاني د خبرو پر وړاندې شکایت وکړي.

د اغلې سیمیا پر وینا، د افغانستان د جزا قانون له مخې، هما سلطاني جرم کړی او د جزایي محکمو د اصولو له مخې باید ورسره چلند وشي.

نوموړې زیاتوي، چې د دغو خبرو په برخه کې د ولسي جرګې غړي حقوقي خونديتوب نه لري او د ولسي جرګې د دې غړې «جرم» چې خپله د قانون جوړونې بنسټ غړې ده، زیات دی.

دې مېرمنې وویل، چې د افغانستان په قانون کې د تور، توهین او قذف په اړه جزاوې مشخصې شوي دي.

له بل لوري څوو معتبرو نړیوالو رسنیو په غیر مستقیم او یو اړخیز ډول پر طلوع تلوېزیون د طالبانو برید کم ارزښتو په کلماتو کې غندلی دی.

په همدې حال کې د ولسمشرۍ ماڼۍ د ویاند مرسیتال سید ظفر هاشمي وایي، چې له هغو کسانو سره چې په ټولنیزو شبکو کې د طالبانو له بریدونو ملاتړ کوي قانوني چلند به وشي.

هاشمي زیاتوي، چې اړوندو بنسټونو ته یې دنده سپارلې، چې د ټولنیزو شبکو د دغو ډول استفاده کونکو په اړه څیړنې وکړي.

د تېرې اونۍ برید د خبریالانو د وژلو په اړه بې سارې و او په دغه برید کې د طلوع تلوېزیون ۷ تنه کارکوونکي وژل شوي او ۲۷ تنه نور ټپیان شول.

د طالبانو په دغه برید کې د طلوع تلوېزیون له کارونکو پرته نور خلک هم وژل شوي او ټپیان شوي وو.