د بغلان ولایت امنیه قوماندان پاسوال نور حبیب ګلبهاري وايي، چې وسله والو طالبانو نن (شنبه) په شمالي سالنګ کې د بندیانو په لېږدوونکي کاروان برید کړی.
ګلبهاري سلام وطندار سره په مرکه کې وویل، په دې برید کې یوه زندانۍ مېرمن او درې پولیس وژل شوي او د پولیسو درې نور سرتېري ټپيان شوي دي.
د بغلان ولایت امنیه قوماندان وايي، که څه هم د دې لارې د امنیت خوندیتوب په موخه یې څو امنیتي پوستې جوړې کړي، خو طالبان له غرونو او شنو سیمو په ګټې اخیستو کله نا کله د شمال بغلان په لویه لار غلچکي بریدونه کوي.
قوماندان وايي، زیاتره وخت وسله وال طالبان د رومبک غره له څوکې انداخت کوي او د امنیتي ځواکونو له مقامت سره سم تېښته کوي.
په همدې حال کې د بغلان ولایتي شورا غړی بسم الله عطاش په دې اړه د اندېښنې په څرګندولو وویل، چې امنیتي چارواکي د لویې لارې د امنیت په خوندیتوب کې پاتې راغلياو اوسمهال طالبان د هېواد په شمالي او شمال ختیځو لویو لارو کې حضور لري.
عطاش وايي، وسله وال طالبان په پیازقول، سیا چوب او سنګ سرا خ کې فعالت کوي او هر ځل یې د بغلان او شمال لویه لار په ساعتونو ساعتونو تړلي وي.
تردې وړاندی هم طالبانو د شمالي سالنګ په سیمه کې د امنیتې ځواکونو په کاروانونو بریدونه کړی و.
